Protesta në Armeni, mijëra mbështetës të opozitës bllokuan Parlamentin
BKT
   Bota

Protesta në Armeni, mijëra mbështetës të opozitës bllokuan Parlamentin

Mijëra mbështetës të opozitës bllokuan Parlamentin armen sot, duke kërkuar përsëri dorëheqjen e kryeministrit Nikola Pashinyan.

Për muaj me radhë, Pashinyan refuzoi të jepte dorëheqjen për shkak të marrëveshjes së paqes që ai arriti me Azerbajxhanin në nëntor, duke i dhënë fund luftës mbi rajonin e Nagorno-Karabakut, zyrtarisht territor i Azerbajxhanit, i kontrolluar nga separatistët armenë.

Tensionet politike u përshkallëzuan muajin e kaluar kur shtabi i përgjithshëm i ushtrisë armene kërkoi dorëheqjen e Pashinyan dhe kryeministri u përgjigj duke shkarkuar Onik Gasparyan. Opozita rriti presionin mbi Pashinyan sot, duke u bërë thirrje mbështetësve të bllokojnë parlamentin.

Në thirrje, mijëra protestues rrethuan ndërtesën e parlamentit, me përleshje të herëpashershme me policinë. Politikani i opozitës Vazgen Manukyan, të cilin opozita e propozon si kryeministër të përkohshëm, parashikoi që ushtria nuk do të pranonte urdhrin e Pashinyan për shkarkimin e shefit të shtabit të përgjithshëm, Onik Gasparyan. “Ushtria nuk do të tërhiqet, sepse nuk është problem i një njeriu,” tha Manukyan.

Në mënyrë që të zvogëlojë krizën politike, Pashinyan ofroi të mbajë zgjedhje të parakohshme parlamentare këtë vit, por refuzoi kërkesën e opozitës për t’u tërhequr para votimit. Demonstratat masive kundër Pashinyan filluan më 10 nëntor, pasi ai, me ndërmjetësimin e Rusisë, nënshkroi një marrëveshje me Azerbajxhanin për t’i dhënë fund luftës gjashtë-javore rreth Nagorno-Karabakut, në të cilën u vranë më shumë se 6.000 njerëz.

Me këtë marrëveshje, Armenia humbi kontrollin mbi një pjesë të Nagorno-Karabakut dhe zonave përreth në Azerbajxhan pas më shumë se 25 vjetësh.