Një tërmet i fuqishëm godet Assam-in e Indisë
Një tërmet me fuqi 6.4 goditi Assam këtë mëngjes, tha Qendra Kombëtare e Sizmologjisë së Indisë.
Sipas mediave të huaja, përcjell Telegrafi, dridhje të forta janë ndjerë në pjesë të verilindjes, si dhe në veri të Bengalit.
Ndërsa nuk ka raportime për ndonjë të lënduar, janë shfaqur fotografi të mureve dhe dritareve të thyera.
Lëkundje të forta u ndien në mënyrë të përsëritur në disa pjesë të verilindjes dhe Butanit fqinj, duke i detyruar njerëzit të dilnin nga shtëpitë e tyre, sipas një dëshmitari të Reuters.
Siç bëhet e ditur, epiqendra e tërmetit ishte afër qytetit Dhekiajuli, 140 km (86 milje) në veri të Guwahati.
Tërmeti goditi në 7:51 të mëngjesit në një thellësi prej 17 km nga sipërfaqja.
Kryeministri Narendra Modi tha se ka folur me kryeministrin e Assam, Sarbananda Sonowal dhe premtoi ndihmë nga pushteti qendror.























