Gjermani, dy të tretat e qytetarëve të pakënaqur me menaxhimin e pandemisë
Pothuajse dy të tretat e qytetarëve gjermanë janë të pakënaqur me mënyrën se si qeveria po shpjegon dhe justifikon kufizimet aktuale mbi koronavirusin, sipas sondazhit të fundit të ”Dimap” për transmetuesin televiziv, ARD.
Numri i njerëzve që kritikojnë shpjegimin e rregullave u ul pak në sondazhin e majit krahasuar me prillin.
Në përgjithësi, 65% e qytetarëve me të drejtë vote janë të pakënaqur me mënyrën e komunikimit të masave, me 7 pikë përqindje më pak se në prill.
Rreth 32% e të anketuarve janë të kënaqur me mënyrën e komunikimit të rregullave, 5 pikë përqindje më shumë se në prill.
Vlerësimi i fushatës së vaksinimit Covid-19 gjithashtu ishte më pozitiv në maj, me 36% që e konsideroi atë pozitiv, krahasuar me 16% në prill.
Rreth 62% janë të pakënaqur me menaxhimin e vaksinimit, 21 pikë përqindje më pak se në prill.
Vlerësimi i fushatës së vaksinimit varet shumë nga mosha, me rreth gjysmën e njerëzve mbi 65 vjeç që japin një vlerësim pozitiv./atsh























