Moldavia, Ukraina dhe Gjeorgjia me memorandium për anëtarësimin në BE
Moldavia, Ukraina dhe Gjeorgjia kanë nënshkruar një memorandum në Kiev, që zyrtarizon bashkëpunimin e tyre në një rrugë të përbashkët drejt anëtarësimit në Bashkimin Europian.
Ministri i Jashtëm moldav, Aureliu Ciocoi, tha se me këtë memorandum, të tri vendet me aspirata europiane po dërgojnë një sinjal tjetër të fortë, se ata do të vazhdojnë të zbatojnë planet e reformës dhe modernizimit.
Ky memorandium përcakton një sërë objektivash për bashkëpunimin në rrugën drejt anëtarësimit në union, përfshirë aktivitetet e përbashkëta diplomatike dhe konsultimet trepalëshe.
“Kjo iniciativë e re do të na ndihmojë të ecim në mënyrë më efektive dhe së bashku drejt integrimit evropian. Ukraina, Gjeorgjia dhe Moldavia kanë statusin e partnerëve të lidhur në marrëdhëniet me Bashkimin Evropian”, tha ministri i Jashtëm ukrainas, Dmytro Kuleba.
Të tri shtetet ranë dakord të zhvillojnë iniciativa të përbashkëta në dialog me institucionet e BE-së dhe të koordinojnë pozicionet e tyre brenda Partneritetit Lindor.
David Zalkaliani, ministri i jashtëm i Gjeorgjisë, theksoi se memorandumi ishte një hap i rëndësishëm politik.























