Aktivisti rus burgoset pse veshi maicë me mbishkrimin “Liri për Navalnyn”
Një aktivist rus është dënuar për ecje në Sheshin e Kuq të Moskës me maicë në të cilën shkruhej “Liri për Navalnyn”, lider i opozitës ruse që është burgosur.
Një gjykatë në Moskë e dënoi të mërkurën me dhjetë ditë burgim Vladislav Kazakovin për shkeljen e ligjit për mbajtjen e ngjarjeve publike, shkruan Free Europe, transmeton Gazeta Express.
Kazakov ishte ndaluar në Sheshin e Kuq një ditë më parë. Persona të paidentifikuar gjithashtu ia vunë flakën veturës së tij, në xhamin e pasmë të së cilës shkruhej “Liri për Navalnyn”.
I dënuari më parë ishte vullnetar në zyrat politike të Navalnyt në qytetin Saratov, të cilat tashmë janë mbyllur pasi rrjeti i opozitarit u shpall ekstremist nga autoritetet ruse.
Navalny, kritiku më i njohur vendës i Putinit, u arrestua në janar pas kthimit nga Gjermania, ku mori trajtim mjekësor për pesë muaj pas hemimit me agjent nervor në Rusi. Ai e ka fajësuar Kremlinin për helmimin e tij, por autoritetet ruse kanë mohuar se kanë gisht në këtë çështje.
Ai është dënuar me dy vjet e gjysmë burgim në një rast që nga shumë njerëz u pa si i motivuar politikisht. Në prill, dhjetëra mijëra njerëz protestuan për lirimin e tij, pas protestave të ngjashme masive në janar kundër arrestimit të Navalnyt.























