Katedralja Notre Dame është e qëndrueshme për rindërtim
Sharr Travel

Katedralja Notre Dame është e qëndrueshme për rindërtim

Katedralja Notre Dame e Parisit është më në fund e qëndrueshme dhe mjaft e sigurtë për artizanët që të fillojnë ta rindërtojnë atë, pas më shumë se dy vjet nga zjarri që dogji çatinë e saj, teksa rrëzoi një pjesë të katedrales.

Agjencia qeveritare që mbikqyr rindërtimin njoftoi në një deklaratë këtë të shtunë se punimet për të siguruar strukturën – e cila filloi një ditë pas zjarrit të 15 Prillit 2019 – më në fund kanë përfunduar, shkruan AP.

Ekspertë të skelave, alpinistë profesionistë, mekanikë dhe legjione të të tjerëve morën pjesë në përpjekjen, e cila përfshinte struktura të veçanta të përkohshme për të siguruar kullat ikonike të katedrales, qemerët dhe muret e strukturës së madhe pa çati dhe një “ombrellë” të veçantë për ta mbrojtur atë nga moti.

Negociatat tani do të fillojnë me kompanitë që konkurrojnë për të marrë pjesë në përpjekjet për rindërtimin e saj, thuhet në deklaratë.

Ndërtimi do të përfshijë rreth 100 tendera të ndryshëm për projektet e ndryshme të përfshira.

Puna për restaurimin e saj do të fillojë në vjeshtë, ndërsa punimet e tjera pritet të fillojnë në dimër.

Agjencia po mban qëllimin e Presidentit Emmanuel Macron për të lejuar vizitorët të kthehen brenda në 2024, vit kur Parisi pret Olimpiadën.

Njoftimi u bë këtë fundjavë kur vendet në të gjithë Evropën festojnë Ditët e Trashëgimisë, kur monumentet historike, ndërtesat qeveritare dhe vendet e tjera hapen për publikun.