Suedia refuzon thirrjen e Rusisë kundër zgjerimit të NATO-s drejt lindjes
Suedia kundërshton kërkesën e Rusisë që NATO të mos marrë anëtarë të rinj, deklaroi ministrja e Jashtme Ann Linde, e cila shprehu gjithashtu shqetësime për përshkallëzimin ushtarak rus në kufirin me Ukrainën.
“Ne kundërshtojmë me vendosmëri të gjitha negociatat nga pala suedeze që kanë të bëjnë me thelbin e rendit evropian të sigurisë. Ne duhet të kemi një rend botëror të bazuar në rregulla, ku kemi të drejtën ndërkombëtare dhe çdo vend ka të drejtën të bëjë zgjedhjet e veta të politikës së sigurisë”, tha Linde.
Edhe pse kërkesat ruse i drejtohen kryesisht SHBA-së dhe NATO-s, ato prekin edhe Suedinë, e cila nuk është pjesë e NATO-s.
“Suedia dhe Finlanda janë shumë të prekura nga kjo. Refuzimi i çdo zgjerimi të ardhshëm të NATO-s do të zvogëlojë mundësitë për të bërë zgjedhje të pavarura politike”, deklaroi ministrja e Jashtme. Në fillim të këtij muaji, Finlanda iu përgjigj thirrjes së Rusisë, duke thënë se kishte “hapësirë kombëtare për manovrim”, duke përfshirë mundësinë e shtrirjes ushtarake dhe aplikimin për anëtarësim në NATO.
Linde shprehu gjithashtu shqetësime për përshkallëzimin ushtarak rus në kufirin me Ukrainën dhe është takuar me kolegë në Mbretërinë e Bashkuar dhe vendet nordike dhe baltike në ditët e fundit për të diskutuar situatën.
“Nëse diçka ndodh në lidhje me rritjen e agresionit kundër Ukrainës, ne do të përgjigjemi të bashkuar dhe shumë ashpër me lloje të ndryshme sanksionesh ekonomike”, tha Linde në një intervistë me agjencinë kombëtare të lajmeve TT të mërkurën.
Situata rreth Ukrainës nënkuptonte “vigjilencë të plotë” gjatë festave të Krishtlindjeve dhe Vitit të Ri, deklaroi gjithashtu ministrja.























