Dendias: BE duhet të diskutojë kërcënimet në rajonin e Mesdheut Lindor
Ministri i Jashtëm grek, Nikos Dendias, do të marrë pjesë në takimin joformal dyditor të ministrave të Jashtëm të vendeve anëtare të Bashkimit Evropian (Gymnich) në Brest të Francës.
Dendias u mirëprit në një takim nga homologu i tij francez Jean-Yves Le Drian dhe nga Përfaqësuesi i Lartë i BE-së për Punët e Jashtme dhe Politikën e Sigurisë, Josep Borrell.
“Duhet të bëhet një diskutim i sinqertë për atë që kërcënon BE-në në rajonin e Mesdheut Lindor. Shkeljet e së drejtës ndërkombëtare dhe mosmarrëveshjet mbi të drejtat sovrane duhet gjithashtu të adresohen”, tha Dendias.
Ministrat e Jashtëm do të diskutojnë gjithashtu Busullën Strategjike të BE-së gjatë një sesioni të përbashkët me ministrat e Mbrojtjes të vendeve anëtare të BE-së, përpara takimit me krerët shtetërorë në mars. Busulla Strategjike ka të bëjë me objektivat e vitit 2030 për mbrojtjen evropiane.
Situata e sigurisë në Evropën Lindore, veçanërisht në Ukrainë dhe Bjellorusi, do të diskutohet gjithashtu në seancën e parë të takimit të enjten në mbrëmje.
Një sesion i dytë do të mbahet të premten, ku do të shqyrtohen marrëdhëniet BE-Kinë; Kjo do të pasohet nga një drekë pune e organizuar nga presidenca franceze për të diskutuar marrëdhëniet BE-Bashkimi Afrikan./atsh























