EMA miraton përdorimin e Paxlovid për trajtimin e COVID-19
Shëndetësi

EMA miraton përdorimin e Paxlovid për trajtimin e COVID-19

Agjencia Evropiane e Barnave- EMA ka rekomanduar autorizimin e kushtëzuar të marketingut për Paxlovid, ilaçin oral antiCovid të prodhuar nga kompania Pfizer.

Ilaçi rekomandohet për trajtimin e Covid-it tek të rriturit që nuk kanë nevojë për oksigjen shtesë dhe janë në rrezik të lartë që sëmundja të përkeqësohet.

Sipas studimeve të marra në konsideratë, trajtimi me Paxlovid uli ndjeshëm shtrimet në spital dhe vdekjet te pacientët që kanë të paktën një sëmundje kronike që i vë ata në rrezik nga Covid-19.

Shumica e pacientëve që morën pjesë në studim ishin të infektuar me variantin Delta. Bazuar në studimet laboratorike, pilula pritet të jetë efektive edhe kundër Omicron dhe varianteve të tjera.

Profili i sigurisë së Paxlovid ishte i favorshëm dhe efektet anësore ishin përgjithësisht të lehta.

EMA ka arritur në përfundimin se përfitimet e ilaçit janë më të mëdha se rreziqet e tij për përdorim ndërsa rekomandimet e saj do t’i dërgohen Komisionit Evropian për një vendim të shpejtë të zbatueshëm në të gjitha vendet anëtare të BE-së. /atsh