Rusia fut Tajvanin në listën e vendeve jo mike
   Bota

Rusia fut Tajvanin në listën e vendeve jo mike

Rusia ka shtuar Tajvanin në listën e territoreve “jomiqësore”, në përgjigje të sanksioneve ndërkombëtare ndaj Rusisë pasi pushtoi Ukrainën.

Kjo listë u publikua në Tajvan herët në mëngjesin e së martës dhe përfshin vende të tjera, si SHBA, Japonia, Koreja e Jugut, vendet anëtare të BE-së, Britania e Madhe dhe Kanadaja.

Zëdhënësja e Ministrisë së Jashtme, Joanne Ou, thotë se Rusia nuk është një partner kyç për Tajvanin kur bëhet fjalë për tregtinë, dhe se Tajvani ka shumë burime të tjera për naftë dhe gaz natyror.

Ajo thotë se ndërsa Tajvani nuk mbështetet shumë te Rusia, Qeveria do t’i kushtojë vëmendje zhvillimeve të reja dhe do të marrë masat e nevojshme për të siguruar stabilitetin ekonomik.

Në anën tjetër, Tajvani ka dhuruar rreth 10.6 milionë dollarë për refugjatët ukrainas, thuhet në një komunikatë të MPJ-së së Tajvanit.


Ligjvënësit u kërkuan zyrtarëve të shtojnë ndihmën për refugjatët. Ligjvënësi i DPP-së, Wang Ting-yu, pyeti nëse Tajvani mund të lejojë refugjatët ukrainas të vijnë në Tajvan nga Polonia për të jetuar për një kohë.

Ministri i Jashtëm, Joseph Wu, tha se ministria po punon për këtë, duke shtuar se mjekë vullnetarë të Tajvanit mund të shkojnë dhe të ndihmojnë refugjatët ukrainas.

Ministri Wu tha se qeveria duhet të presë që vendet që strehojnë këta refugjatë të kërkojnë ndihmë përpara se të fillojnë të organizojnë vullnetarë për të ndihmuar. Nga 7 deri më 18 mars, ministria e Jashtme do të mbledhë donacione mallrash dhe ilaçesh për refugjatët ukrainas.

Qeveria ka postuar udhëzimet përkatëse dhe një listë të mallrave të pranueshme që përfshijnë batanije, maska ​​​​për fytyrën dhe gjësende të tjera të nevojshme. 


Bast-Trade
AlbiMall
Eurokoha
Vjosa