VIDEO: Dy doktorë nga ORL vendosin të largohen nga SHSKUK-ja
Elmina Osmani/RTK
Alarmuese për shëndetësinë është largimi i mjekëve nga sektori publik. Vetëm sot 2 doktorë të njohur kanë vendosur të largohen nga QKUK-ja. Ata përfundimisht po shkojnë për të punuar në sektorin privat.
Në Klinikën e Otorino-laringo-logjisë nuk do të hyjë më për t’u shërbyer pacientëve, një nga doktorët i cili ishte pikë referuese i mijëra pacientëve, Hajdin Thaçi.
Pas 34 vitesh përvojë si specialist i ORL-së, 21 vitesh shërbim në këtë klinikë e drejtues i klinikës për një dekadë, doktor, Hajdin Thaçi vendosi të largohet nga Shërbimi Spitalor Klinik e Universitar i Kosovës.
"Një luhatje e shëndetit e cila ka rezultuar me çrregullimet e sheqerit në gjak që ekskluzivisht ka të bëjë me stresin. Prandaj, për ta ruajtur shëndetin tim kam vendosur që të jap dorëheqje nga puna të cilën e kam ushtruar Shërbimin Spitalor Klinik dhe Univeristar", tha Hajdin Thaçi Otorinolaringolog.
Por sa e pati të vështirë që pas 21 vitesh karrierë ta lërë SHSKUK-në, së cilës me emrin e tij i dha emrin besim e referencë, tregojnë emocionet e papërmbajtura të doktor Thaçit.
Ai pë RTK-në tha se po largohem me emocione por megjithatë shëndeti është mbi të gjitha. Prandaj vendimi që e kam marrë mendoj se është i drejtë, normalisht vendim i pakthyeshëm.
“Jam i gëzuar shumë që Klinika e ORL-së e ka një staf të mrekullueshëm sidomos kuadrin e ri specializantët" shtoi Thaçi.
Në procedurë të dorëheqjes nga SHKUK është edhe ushtruesi i detyrës së drejtorit në Klinikën e Otorino-laringo-logjisë, Afrim Heta. Këtë e ka konfirmuar për RTK-në, vetë dr. Heta.
Ai përmes telefonit ka bërë të ditur se ka marrë vendim të largohet nga klinika por që ende nuk e ka dorëzuar kërkesën zyrtarisht.
Ndërkohë RTK merr vesh se në prag të dorëheqjes nga shërbimi në Qendrën Klinike Universitare të Kosovës janë edhe tre apo katër doktorë të tjerë.























