Roma thyen mbrojtjen “bunker” të Veronës dhe merr triumfin në “Bentegodi”
BKT
Sport

Roma thyen mbrojtjen “bunker” të Veronës dhe merr triumfin në “Bentegodi”

Roma ka marrë një tjetër sukses, këtë herë në transfertën e vështirë të “Bentegodit” ndaj Veronës, ku triumfoi me rezultatin 1-3 dhe u ngjit përkohësisht në vendin e katërt me 28 pikë në 14 javët e para të kampionatit.

Vendasit vinin në këtë takim me statusin e mbrojtjes më të mirë të kampionatit, me vetëm 11 gola të pësuar në 13 javët e para, por mbrëmjen e sotme u detyrua të nxjerrë 3 herë topin nga rrjeta.

Justin Kluivert zhbllokoi sfidën në minutën e 17’, pasi mori një asist të bukur nga Pellegrini dhe mposhti në shpejtësi Amir Rrahmanin e më pas portierin e Veronës. Megjithatë vendasit gjetën golin e barazimit vetëm 4 minuta më vonë, me anë të Diego Faraopnit.

Në minutën e 45-të pati një 11-metërsh për verdhekuqtë, të cilin e mori përsipër Diego Perotti, i futur në fushë për të zëvendësuar Kluivertin e dëmtuar dhe përballë portierit të Veronës nuk gaboi, duke rikthyer avantazhin te Roma.

Në minutat shtesë, kur Verona ishte hedhur në kërkim të golit që do t’i mundësonte shmangien e humbjes, kryeqytetasit ndërtuan një aksion mjaft të bukur dhe ishte armeni Mkhitaryan që shënoi edhe golin e tretë.

Ky sukses ngjit Romën në vendin e katërt me 28 pikë, dy më pak se Lazio e vendit të tretë, ndërsa javën e ardhshme Roma do të udhëtojë drejt Milanos, për t’u përballur me Interin mbrëmjen e të premtes në “San Siro”.