Edhe Marcelino në garë për trajner të Tottenhamit
BKT
Sport

Edhe Marcelino në garë për trajner të Tottenhamit

Pasi shkarkoi nga puna portugezin Jose Mourinho, Tottenham vijon të shqyrtojë të gjithë alternativat e mundshme për t’u besuar bankinën sezonin e ardhshëm dhe lista sa vjen e zgjerohet.

Kështu emri i parë që doli në qarkullim ishte ai i gjermanit Julian Naggelsman, që aktualisht drejton Leipzig dhe shihet si një nga të rinjtë më me perspektivë të fushës së trajningut.

Së fundi listës i është shtuar edhe italiani Maurizio Sarri, që është i papunë prej gati një viti dhe do të mirëpriste një rikthim në Premier League, ku drejtoi për një sezon londinezët e Chelsea-t.

Megjithatë në Spanjë këmbëngulin se drejtuesit e Tottenham kanë kontaktuar edhe me trajnerin spanjoll Marcelino, i cili aktualisht drejton Athletic Bilbaon dhe mund të largohet në fund të sezonit.

Ky i fundit ka drejtuar me sukses edhe skuadra si Villareal e Valencia, teksa edhe me baskët e Athletic Bilbaos ia doli të fitojë Superkupën e Spanjës në janar dhe është gati për një tjetër hap të madh në karrierë.