20:09 / 27.07.2022
Tovërlani merr drejtimin e Kombëtares U21
Fatmir Bytyqi /RTKlive
Afrim Tovërlani i është kthyer zejes së trajnerit.
Tekniku prishtinas pas një periudhe pushimi, i është rikthyer punës, por kësaj radhe jo te klubet.
Ish-trajneri i disa skuadrave elitare, është emëruar përzgjedhës i Kombëtares së Kosovës U21.
Komiteti Ekzekutiv i Federatës së Futbollit të Kosovës, sot në mbledhjen e radhës vendosi që Tovërlanin ta emërojë në krye të ‘Dardanëve’ të rinj.
“KE shqyrtoi ecurinë e ekipeve kombëtare dhe në këtë drejtim mori vendim që për përzgjedhës të Kombëtares U21 të emërojë futbollistin e spikatur dhe trajnerin më të trofeshëm në futbollin e Kosovës, Afrim Tovërlani”, thuhet në njoftimin FFK-së.
Kujtojmë së pas largimit të Michael Nees, për disa muaj Kombëtaren U21 e drejtoj Albert Bunjaki.























