Mbi 150 vrapues nga 21 shtete të botës pjesë e ‘High Scardus Ultra’
BKT
Sport

Mbi 150 vrapues nga 21 shtete të botës pjesë e ‘High Scardus Ultra’

RTKLive

Mbi 150 vrapues nga 21 shtete të botës ishin pjesëmarrës në edicionin e 2-të të ‘High Scardus Ultra’, një ngjarje vjetore me 3 gara të vrapimit malor në distanca nga 22 – 72 km që mbahen me 2 shtator dhe përfundojnë në Prizren. Gara 72 km është gara e vetme në Ballkan që fillon ne Bregun e Diellit, Tetovë dhe përfundon ne Prizren, Kosovë. Gara ‘High Scardus Ultra’ mbetet gara e vetme në vend që është certifikuar.

‘High Scardus Ultra’, gara e vetme malore në vend që zhvillohet në Malet e Sharrit dhe që lidh shtetin e Kosovës me Maqedoninë Veriore, e përfundon edicionin e vet të dyte.

Në mes të bukurive të malit të Sharrit, kjo garë promovon natyrën, shëndetin, dhe fqinjësinë e mire në mes dy shteteve – përmes dashurisë për natyrën.

Me 3 gara në kategori 22 km, 52 km dhe 72 km, ‘High Scardus Ultra’ regjistroj numër të lartë të pjesëmarrëseve, sidomos pjesëmarrësve të ri, ndërsa edhe kishte nivel të kënaqshëm të numrit që e përfunduan garën me sukses.

“Në gara të vrapimit malor, sidomos në Ultra distanca – pra, distanca më të gjata se maratona – mund të ndodhë gjithçka. Por falë punës së ekipës, profesionalizmit të partnerëve tanë, garat përfunduan ashtu si e kemi planifikuar. Gjithmonë mësojmë diçka të re pas çdo gare, prandaj edhe mësimet nga ky vit, do ti aplikojmë në edicionin tjetër të garës, në mënyrë që të mbajmë një standard më të lartë të nivelit të organizimit. Rëndësi tjetër për neve është që të tregojmë se Mali i Sharrit është i të gjithëve dhe na ofron mundësi të pafundme, kështu që duhemi me çdo kusht ta mbrojmë nga degradimi dhe shfrytëzimi i jashtëligjshëm”, shprehet Flutura Uta Ibrahimi, drejtoresh e garës ‘High Scardus Ultra’.

Garat e vrapimit malor sfidojnë vrapuesit me ngjitje, terrene të ndryshme malore, navigim në natyrë, dhe menaxhim të pajisjeve, ushqimit, dhe pijeve. Pra, është një disiplinë e vrapit që kërkon angazhim dhe përgatitje të mire fizike dhe sidomos mendore.

‘High Scardus Ultra’ gjithashtu thekson rëndësinë e bashkëpunimit, miqësisë dhe unitetit ndërkufitar. Ngjarja inkurajon pjesëmarrësit të lidhen me vrapuesit e tjerë dhe të krijojnë kujtime të qëndrueshme që i tejkalojnë kufijtë gjeografikë.

“Ishte garë mjaft sfiduese, por kur e kalon vijnë e përfundimit, nuk ka qejf më të madh. E sfidon veten, e tejkalon veten, dhe meson shumë për veten. Vrapimi në natyrë nuk krahasohet me vrapimet tjera, të jesh në male, në maje, nëpër lugina, është eksperiencë e paharrueshme. Ti hap sytë!”, shprehet një vrapuese nga kategoria 52km e cila sa e kishte përfunduar garën e vet.

Ngjarja organizohet nga Fondacioni Utalaya dhe organizata TREX nga Maqedonia Veriore, të cilët tashmë organizojnë garat më prestigjioze të vrapimit në shtigje në vendin e tyre të respektuar.