City ngec ndaj Southampton, Champions League në pikëpyetje
Uran Krasniqi/RTKLive
Manchester City ka pësuar një tjetër goditje në garën për një vend në Champions League, pasi nuk ka arritur më shumë se një barazim pa gola (0:0) ndaj Southampton të rënë tashmë nga elita.
Në një ndeshje që më shumë i ka ngjarë një stërvitje sesa një përballje garuese, “Qytetarët” kanë dominuar por duke krijuar shumë pak raste të pastra për gol. Ka qenë Kevin De Bruyne që ka regjistruar tentimin e parë serioz pas gjysmë ore lojë, nga një goditje dënimi që ka përfunduar mbi portë.
Southamptoni, që këtë sezon ka pësuar më shumë gola në pjesët e para se çdo ekip tjetër, ia ka dalë ta mbyllte pjesën e parë pa pësuar.
Trajneri Pep Guardiola ka reaguar me aktivizimin e Jeremy Doku në pjesën e dytë, por loja ka mbetur e njëjtë: me dominim të City dhe mbrojtje të ngjeshur të miqve.
Doku është dalluar me depërtimet e tij, duke krijuar rastin më të mirë për Bernardo Silva, por goditja e këtij të fundit është larguar nga vija fatale nga Jack Stephens. Edhe kur Haaland ka shërbyer për Nico O’Reillyn, ky i fundit ka dështuar ta godasë topin me portën e zbrazët.
Pavarësisht përpjekjeve të vonshme nga Savinho, De Bruyne dhe Omar Marmoush, City nuk e ka gjetur golin.
Me këtë barazim, City e rrezikon edhe zonën “Champions”. Skuadra nga Manchesteri ka 65 pikë dhe renditet në pozitën e tretë, ndërsa pesë pozitat e para të Premier League sigurojnë pjesëmarrjen në edicionin e ardhshëm të garës më të njohur evropiane të klubeve.
Në vendin e katërt ndodhet Newcastle me 63 pikë, ndërsa pikë të njëjta ka edhe Chelsea në pozitën e pestë. Dy skuadrat janë në ndjekje të afërt të City, por në garë për zonën elitare janë edhe Nottingham Forest dhe Aston Villa.
Ndërkohë, Southampton mbetet në vendin e fundit me vetëm 12 pikë dhe tashmë është zyrtarisht i rënë nga liga.























