Napoli fiton ndaj Cremonese dhe ngjitet në vendin e dytë
BKT
Sport

Napoli fiton ndaj Cremonese dhe ngjitet në vendin e dytë

Uran Krasniqi/RTKLive

Napoli ka mbyllur vitin 2025 në mënyrën më të mirë të mundshme, duke fituar 2-0 në transfertë ndaj Cremonese dhe duke u ngjitur në vendin e dytë në Serie A.

Protagonist absolut i ndeshjes ka qenë sulmuesi danez Rasmus Hojlund, autor i të dy golave.

Pas një fillimi të qetë, Napoli ka kaluar në epërsi në minutën e trembëdhjetë. Një gjuajtje e bllokuar e Leonardo Spinazzola ka përfunduar te Hojlund, i cili nga afërsia nuk ka falur dhe ka shënuar golin e tij të pestë sezonal në kampionat. Sulmuesi ka pasur edhe një rast të mirë për ta dyfishuar rezultatin para minutës së tridhjetë e pestë, por këtë herë ka ndërhyrë portieri Emil Audero.

Megjithatë, Hojlund është përmirësuar menjëherë dhe në fund të pjesës së parë e ka realizuar golin e dytë. Mbrojtja e Cremonese ka reaguar dobët, duke i lejuar atij të shënojë nga afër dhe t’i japë Napolit epërsinë e dyfishtë.

Në pjesën e dytë, skuadra e drejtuar nga Antonio Conte e ka kontrolluar lojën dhe ka qenë pranë golit të tretë në disa raste. Scott McTominay dhe Amir Rrahmani kanë pasur mundësi të mira, por pa sukses. Edhe një rast i artë në minutat e fundit është shpërdoruar, kur Hojlund dhe Noa Lang janë penguar mes vete.

Në fund, Napoli e ka ruajtur avantazhin dhe ka marrë një fitore të rëndësishme, që rrit ambiciet për titull. Ndërkohë, Cremonese mbetet në vendin e dymbëdhjetë.