Reali në kërkim të trajnerit të ri, edhe Fabregas në listën e Perezi-t
BKT
Sport

Reali në kërkim të trajnerit të ri, edhe Fabregas në listën e Perezi-t

Fatmir Bytyqi/RTKLive

Gjiganti spanjoll, Real Madrid raportohet se ka nisur të shqyrtojë opsionet për trajnerin e ri për sezonin e ardhshëm, ndërsa klubi synon të ndërtojë një projekt afatgjatë pas periudhës së përkohshme të drejtimit nga Alvaro Arbeloa.

Sipas gazetarit Jorge Picon, Arbeloa shihet nga drejtuesit e klubit si një zgjidhje tranzitore, ndërsa madrilenët po monitorojnë disa kandidatë të njohur për stolin e ekipit.

Në krye të listës mbetet ish-trajneri i suksesshëm i klubit, Zinedine Zidane, i cili vazhdon të jetë opsioni i preferuar i presidentit Florentino Perez.

Megjithatë, rikthimi i tij në Madrid mund të ndërlikohet për shkak të interesimit të mundshëm për të marrë drejtimin e Kombëtares së Francës në të ardhmen.

Ndër kandidatët që vlerësohen nga drejtuesit madrilenë përmendet edhe ish-trajneri i Liverpool FC, Jurgen Klopp. Sipas raportimeve, tashmë janë bërë kontakte fillestare me përfaqësuesit e trajnerit gjerman.

Një emër surprizë në listën e mundshme të Real Madridit është edhe ish-mesfushori i njohur spanjoll Cesc Fabregas, i cili aktualisht drejton skuadrën italiane Como 1907. Ai vlerësohet lart nga disa figura me ndikim në klub për stilin e tij të drejtimit dhe potencialin si trajner.

Drejtuesit e Real Madridit pritet të marrin një vendim përfundimtar në muajt e ardhshëm, ndërsa klubi po analizon me kujdes opsionet për të zgjedhur trajnerin që do të udhëheqë projektin e ri sportiv.