Zyrtare: Etnik Brruti transferohet te Hajduk Split
F.B/RTKLive
Mesfushori kosovar Etnik Brruti ka kompletuar transferimin e tij nga FC Malisheva drejt gjigantit kroat Hajduk Split, duke nënshkruar kontratë trevjeçare si lojtar i lirë.
Lajmi është konfirmuar nga klubi kroat, i cili ka zyrtarizuar afrimin e mesfushorit 21-vjeçar si pjesë e planeve për përforcimin e skuadrës në mesfushë për sezonet e ardhshme.
Brruti largohet nga FC Malisheva pas një periudhe ku u shqua me paraqitje të qëndrueshme në kampionatin vendor, duke tërhequr vëmendjen e skautëve ndërkombëtarë me potencialin dhe zhvillimin e tij të vazhdueshëm.
Nga ana tjetër, ai i bashkohet një prej klubeve më të mëdha në rajon, Hajduk Split, ku pritet të ketë mundësi të reja zhvillimi dhe konkurrencë më të madhe në një ambient më kërkues futbolli.
Kontrata e nënshkruar mes palëve është e vlefshme për tre vite, ndërsa drejtuesit e Hajduk Split besojnë se Brruti do të jetë një investim afatgjatë për skuadrën.
Ky transferim përbën një hap të rëndësishëm në karrierën e reprezentuesit të Shqipërisë, i cili synon të afirmohet në futbollin evropian përmes paraqitjeve në elitën e futbollit kroat.























