Osimhen në orbitën e Arsenalit, nisin bisedimet me Galatasarayn
F.Bytyqi/RTKLive
Arsenali dhe Galatasaray raportohet se kanë nisur negociatat për një transferim të mundshëm të Victor Osimhenit.
Klubi londinez po punon për të sistemuar skuadrën para mbylljes së afatit kalimtar veror dhe po shqyrton mundësinë e largimit të disa lojtarëve. Martinelli dhe Nwaneri janë ndër futbollistët që mund të largohen këtë verë.
Galatasaray raportohet se ka paraqitur ofertën prej rreth 38.5 milionë paundësh për Martinellin, ndërsa klubi turk ka shfaqur interesim edhe për Nwanerin, i cili sezonin e kaluar e përfundoi në huazim te Marseille.
Sipas “The Telegraph”, gjatë bisedimeve mes Arsenalit dhe Galatasarayt është diskutuar edhe emri i Osimhenit. Megjithatë, ende nuk dihet se cila palë e ka hedhur në tavolinë mundësinë e këtij transferimi.
Arsenali e ka ndjekur prej kohësh sulmuesin nigerian dhe ai vazhdon të jetë në listën e dëshirave të Mikel Artetës. Megjithatë, prioriteti i klubit londinez duket të jetë Julian Alvarez i Atletico Madridit.
Vlerësimi prej mbi 100 milionë paundësh që Atletico Madrid i ka vendosur argjentinasit, deri më tani, e ka bërë një marrëveshje të tillë shumë të vështirë për t'u realizuar.
Ndërkohë, Osimhen ka zhvilluar një periudhë mbresëlënëse te Galatasaray, ku iu bashkua fillimisht në huazim nga Napoli në vitin 2024. Sulmuesi nigerian ka shënuar 59 gola në 74 paraqitje për klubin turk.
Tashmë mbetet të shihet nëse bisedimet mes Arsenalit dhe Galatasarayt do të shkojnë përtej diskutimeve fillestare dhe nëse Osimheni mund të bëhet një nga transferimet më të bujshme të kësaj vere.























