Arsenal-Liverpool, një tjetër betejë, Arteta synon Quansaha-n
BKT
Sport

Arsenal-Liverpool, një tjetër betejë, Arteta synon Quansaha-n

F.Bytyqi/RTKLive

Arsenali raportohet se ka bërë kontaktet e para me përfaqësuesit e Jarell Quansah, teksa Mikel Arteta po shqyrton mundësinë për ta transferuar mbrojtësin anglez nga Bayer Leverkusen.

Quansah, i cili u largua nga Liverpooli për rreth 35 milionë paundë verën e kaluar, ka bërë përshtypje të mirë në Gjermani. Paraqitjet e tij bindën edhe trajnerin e Anglisë, Thomas Tuchel, ta përfshinte në skuadrën për Kupën e Botës, ku mbrojtësi ndihmoi kombëtaren angleze të siguronte medaljen e bronztë.

Tuchel kishte vlerësuar më herët cilësitë e 23-vjeçarit, duke veçuar shpejtësinë, forcën fizike dhe aftësinë e tij në lojën ajrore, si dhe faktin se mund të aktivizohet edhe në krahun e djathtë të mbrojtjes.

Këto paraqitje duket se kanë tërhequr vëmendjen e Arsenalit. Sipas ekspertit te transferimeve, Fabrizio Romanos, klubi londinez ka kontaktuar këtë javë me kampin e Quansah për të diskutuar mundësinë e një transferimi.

Megjithatë, Bayer Leverkusen nuk dëshiron të heqë dorë nga mbrojtësi dhe synon ta mbajë atë në skuadër edhe për sezonin e ri.

Liverpooli kishte një klauzolë rikthimi prej 70 milionë eurosh, por ajo skadoi gjatë kësaj vere. Për klubet e tjera nuk ekziston një klauzolë e tillë, çka do të thotë se Arsenali duhet të negociojë drejtpërdrejt me Leverkusenin për një marrëveshje.

Arteta kishte shfaqur interes edhe për mbrojtësin e Aston Villës, Ezri Konsa, por kërkesat e larta financiare e bënë transferimin të vështirë.

Quansah dhe Konsa ishin bashkë me Anglinë në Kupën e Botës, ndërsa mbrojtësi i Leverkusenit shihet si një lojtar me potencial të madh për të ardhmen. Një transferim i tij në Arsenal do të ishte veçanërisht i bujshëm, duke pasur parasysh të kaluarën e tij te Liverpooli.