Gjilani mposht Vushtrrinë dhe rrëmben pozitën e parë
Skuadra e Gjilanit ka shënuar fitore si mysafire në duel me Vushtrrinë në stadiumin “Ferki Aliu”, me rezultat 3:1, në ndeshjen e javës së 14-të në Ipko Superligë.
Pas kësaj fitoreje Gjilani ngjitet në pozitën e parë në renditje, me 30 pikë, aq sa ka edhe Ballkani. Golat për Gjilanin i shënuan Razak Keita, në minutën e 18-të, Armend Halili, në minutën e 44-t dhe Gerhard Progni, në minutën e 78-të, derisa golin e nderit për vushtrriasit e shënoi Bashkim Shala, pak para përfundimit të ndeshjes. Ndërkohë, Ferizaj ka realizuar fitoren e parë në shtëpi në këtë edicion, duke i dhënë fund serisë prej katër humbjeve radhazi. Golin e tri pikëve të rëndësishme për ferizajasit në duel me Flamurtarin e ka realizuar Adonis Shala në minutën e 27-të. Ferizaj pas kësaj fitore renditet në pozitën e 10-të me 12 pikë, aq sa ka edhe Flamurtari një pozitë më lart.























