Lady Gaga flet për traumat e jetës, dhunimet
Këngëtarja dhe aktorja Lady GaGa (33) vendosi që gjatë turneut të saj ‘2020 Vision: Your Life In Focus’ të flasë për shëndetin dhe traumat që ia shënuan jetën e saj. Ajo ia tregoi të gjitha prezantueses Oprah Winfrey (65) përpara 15.000 njerëzve në Florida.
“Kam qenë e dhunuar shumë herë kur isha 19-vjeçare. Nuk kisha psikiatër, as mjek që do të mund të më ndihmonte. Kam PTSD dhe vuaj nga dhimbje kronike. Dhimbja neuropatike si përgjigje ndaj traumës është pjesë e jetës sime. Marr antidepresantë, i kam disa mjekë tani, dhe kështu mbijetoj”, – tha këngëtarja, duke shtuar se ajo ishte abuzuar nga një person që e njihte mirë. Ajo gjithashtu e pranoi se për shkak të të gjitha vuajtjeve e kishte prerë veten nëpër trup.
“Arrita ta ndaloja vetë-lëndimin kur e kuptova se ajo që po e bëja ishte t’u tregoja njerëzve që po luftoja me dhimbje në vend që t’ua thosha këtë. E them këtë me shumë përulësi dhe forcë. Jam mirënjohëse që nuk e bëj më këtë dhe nuk dua ta romantizoj këtë”, – tha ajo.























