Këngëtarja kanadeze Céline Dion është rikthyer të shtunën në skenë, gjashtë vjet pas koncertit të saj të fundit, duke performuar para rreth 30 mijë fansave në Paris.

58-vjeçarja u shfaq e emocionuar teksa nisi koncertin në Plenitude Arena me këngën e saj “On ne change pas”. Pas përfundimit të këngës, fansat brohoritën emrin e saj.

Rikthimi i Dion vjen pas një periudhe të vështirë shëndetësore. Ajo ishte detyruar të anulonte koncertet pasi u diagnostikua me Sindromën e Personit të Ngurtë, një çrregullim i rrallë neurologjik që ndikoi në aftësinë e saj për të performuar.

“Rruga ishte më e vështirë nga sa e prisja”, u tha ajo fansave, duke shtuar: “Sonte dua të këndoj për ju, të këndoj për veten time, të këndoj për jetën”.

Koncerti i së shtunës shënon nisjen e një serie prej 26 koncertesh të Dion në Paris, për të cilat biletat janë shitur.

Rikthimi i saj u prit me entuziazëm të madh nga fansat, të cilët kishin udhëtuar nga vende të ndryshme të botës për ta parë sërish këngëtaren në skenë. / Burimi: France 24