Shqipëri, 985 milionë euro fatura e dëmeve nga tërmeti
BKT
Shqipëri

Shqipëri, 985 milionë euro fatura e dëmeve nga tërmeti

Dëmet e shkaktuara nga tërmeti i fortë me magnitudë 6.4 i shkallës Rihter, që goditi vendin tonë mëngjesin e 26 nëntorit llogariten përafërsisht 984 milion 74 mijë e 906 euro.

Drejtuesi Qendror i Komitetit Ndërministror të Emergjencave Civile, Bledi Çuçi deklaroi sot rreth 60 ekspertë të huaj dhe vendas duke përfshirë edhe asistencën e Bashkimit Europian, Kombeve të Bashkuara dhe Bankës Botërore punuan për hartimin e raportit të vlerësimit të dëmeve nga tërmeti.

Çuçi bëri të ditur po ashtu se për vlerësimin e dëmeve është ndjekur metodologjia PDNA  (Post disaster needs assessment), që përdoret nga të gjitha vendet e botës në situata të tilla.

“Ky dokument do të shërbejë si udhërrëfyes për programin e rindërtimit”, deklaroi ministri Çuçi

Tërmeti i 26 nëntorit 2019, një nga ditët më të rënda për popullin shqiptar shkaktoi 51 viktima, plagosi rreth 1 mijë të tjerë dhe zhvendosi nga banesat më shumë se 17 mijë njerëz në total. Prej kësaj katastrofe u prekën 200 291 persona nga 11 bashki të vendit.

“Qeveria shqiptare ndërmori masa të menjëhershme për operacionin e kërkim-shpëtimit e akomodimin e  familjeve të prekura, ndërsa kërkoi menjëherë kontributin e miqve, partnerëve e institucioneve ndërkombëtare për përballimin e situatës e vlerësimin e dëmeve”, deklaroi Çuçi.

Po ashtu, Çuçi informoi se për hartimin e këtij raporti janë marrë për bazë akt-ekspertiza nga inspektimet në mbi 50 mijë ndërtesa, ose 80% të totalit të ndërtesave të dëmtuara si dhe inspektimet në 100 % ndërtesave me rrezikshmëri të lartë. Paralelisht, tha ai, janë zhvilluar edhe 4 anketa për të evidentuar pasojat socio-ekonomike

“Të tre institucionet BE, BB dhe OKB na asistuan në mënyrë profesionale për hartimin e raporti PDNA, pa të cilin nuk mund të shkonim në konferencën e donatorëve në 17 shkurt, në Bruksel

Deri tani, Çuçi bëri të ditur se qeveria ka miratuar një fond prej 20 miliardë lekësh për këtë program dhe 18 zona ndërtimore.


MË SHUME NGA Shqipëri