Danimarka mbështet Shqipërinë në procesin e integrimit europian
Sharr Travel

Danimarka mbështet Shqipërinë në procesin e integrimit europian

Është bërë e ditur se kryetari i Kuvendit, Gramoz Ruçi, ka uruar homologun e Danimarkës, Henrik Kristensen, me rastin e 5 Qershorit, Ditës së Kushtetutës, teksa i ka bërë ftesë Kristensen të vizitojë Tiranën.

“Nënshkrimi dhe shpallja e Kushtetutës më 5 qershor 1849 ishte një ngjarje e madhe historike për sistemin demokratik, emancipimin politik e shoqëror dhe të ardhmen e popullit mik danez. Në Kushtetutën e shpallur më 5 qershor 1953 u zgjeruan edhe më shumë të drejtat civile edhe private të qytetarëve”, thekson Ruçi, përcjell albinfo.ch.

“Përfitoj nga ky rast për t’ju falënderuar që Danimarka iu bashkua vendimit të Këshillit Europian të 25 marsit 2020 për çeljen e negociatave me Shqipërinë. Siç edhe diskutuam gjatë takimit tonë në Strasburg në tetor të viti të kaluar, avancimi i arritjeve të Shqipërisë në reformat integruese është një investim për të ardhmen europiane të Shqipërisë dhe Ballkanit Perëndimor”, shprehet Ruçi.

“Për fat të mirë, Shqipëria dhe Danimarka patën pasoja jo të rënda nga pandemia e koronavirusit dhe po dalin nga kjo situatë. Të njëjtën urojmë edhe për popujt e tjerë të botës. Shpresoj që bashkëpunimi ynë të rifillojë së shpejti dhe kam kënaqësinë t’ju ftoj për një vizitë zyrtare në Shqipëri, në një kohë të përshtatshme për ju”, shkruan kryetari i Kuvendit, Gramoz Ruçi, në letrën drejtuar Presidentit të Parlamentit të Danimarkës, Henrik Dam Kristensen, me rastin e Ditës së Kushtetutës.