Ronaldo ka shënuar kundër 41 shteteve, por asnjëherë kundër Shqipërisë
BKT
Sport

Ronaldo ka shënuar kundër 41 shteteve, por asnjëherë kundër Shqipërisë

Ekipi kombëtar i Shqipërisë është ndër të paktët kundër të cilëve Cristiano Ronaldo ka dështuar të shënojë gol, pavarësisht se është ballafaquar katër herë me kuqezinjtë gjatë karrierës së tij në fanellën e Portugalisë.

Ronaldo u bë vetëm lojtari i dytë në botë që i shënon 100 apo më tepër gola për kombëtaren e vet, pasi i shënoi dy gola të jashtëzakonshëm në fitoren e Portugalisë 2:0 kundër Suedisë në Ligën e Kombeve të martën, shkruan Gazeta Express.

Pesë herë fituesi i Topit të Artë tani ngel vetëm tetë gola larg Ali Daei, i cili është i pari më 109 gola të shënuara për Kombëtaren e Iranit.

Në përgjithësi, Ronaldo u ka shënuar të paktën një herë 41 kombëtareve të ndryshme, por jo edhe Shqipërisë.

Madje, kuqezinjtë bëjnë pjesë në mesin e kombëtareve të fuqishme që sulmuesi i Juventusit ka dështuar t’iu shënojë gol.

Kundërshtarët me të cilët Ronaldo është përballur të paktën tri herë dhe nuk u ka shënuar gol janë: Shqipëria (4 ndeshje), Franca (4 ndeshje), Gjermania (4 ndeshje), Brazili (3 ndeshje) dhe Anglia (3 ndeshje).

Ronaldo është përballur me Shqipërinë në katër ndeshje, një miqësore dhe tri garuese, në kualifikime për Kupën e Botës dhe për Kampionatin Evropian.