Kryeministri Rama: Jam i bindur në fitoren e një mandati të tretë
BKT
Shqipëri

Kryeministri Rama: Jam i bindur në fitoren e një mandati të tretë

Nga sheshi i inceneratorit të Elbasanit, kryeministri Edi Rama, është shprehur i bindur për një fitore të një mandati të tretë.

Në ftesën që pati për të gjithë, për t’iu bashkuar PS-së, zoti Rama tha se “sa herë kjo parti ka drejtuar vendin, ai ka ecur përpara”.

“PS e ka pasur dhe do e ketë, pavarësisht se kush është lideri, prirjen për t’u vetëripërtirë, për t’u modernizuar, për t’u hapur dhe për t’u shtrirë. PS ka humbur jo se e kanë mundur të tjerët, por se ka mundur vetëveten, se nuk ka qenë në lartësinë e sfidës apo të nevojës për të mos lejuar që vendi të kthehet pas. Vendi është kthyer pas, sa herë që atyre u është dhënë mundësia që ta bëjnë. Nëse kthehemi pas dhe shohim të gjitha zgjedhjet, do të shohim si në një film të përsëritur që kur PD merr në dorë çelësat e bën shtëpinë rrëmujë, dhe kur PS ka në dorë çelësat e shtëpisë, në shtëpi vendoset rregulli. Kjo është baza”, tha Rama.

Kreu i PS-së Edi Rama ka bërë të ditur sot nga Elbasani se PS kërkon emra të rinj për të kandiduar në zgjedhjet e 25 prillit.

“Ne na duhen vajza dhe djem, si vajza që foli para meje dhe Evisit, shqiptarë që vijnë nga jeta e përditshme, vijnë nga puna, nga përpjekjet dhe rezultatet në rrugën e tyre, qofshin në rrugën e qytetit, qofshin në rrugën e fshatit. Qofshin profesionistë në qytet apo fshat. Ne na duhen njerëz që vijnë nga lufta e përditshme, që duan të bëjnë jetën e tyre më të mirë dhe të familjes me punë, duke mësuar edhe nga gabimet e tyre e për të mos u dorëzuar përballë vështirësive. Jam besim-plotë se jemi në rrugën e duhur.

Në këtë rrugë na duhen energji të mëdha. Nuk na sfidojnë dot. Janë shumë mbrapa. Është opozitë mizerabël në çdo aspekt, në lidhjet me njerëzit, në aspektin e halleve të përditshme. Sot është një opozitë e pandershme. Procesi ynë është i drejtpërdrejtë, është ftesë e hapur”, tha Rama.

Partia Socialiste ka prezantuar platformën, përmes të cilës, të gjithë të interesuarit mund të aplikojnë për të qenë pjesë e listës së hapur të kësaj force politike në zgjedhjet e 25 prillit. Në vetëm 4 ditë, që prej lançimit të kësaj platforme, janë plot 16 mijë qytetarët që janë regjistruar dhe 46 prej tyre kanë përfunduar aplikimin e plotë. Aplikimi do të jetë i hapur për të gjithë deri në datën 25 nëntor. /rtsh.al


MË SHUME NGA Shqipëri