Prishtina kualifikohet në finalen e Superkupës, e mposht Rahovecin
BKT
Sport

Prishtina kualifikohet në finalen e Superkupës, e mposht Rahovecin

Prishtina ka arritur të kualifikohet në finalen e madhe të Reload Superkupës së Kosovës në basketboll. Basketbollistët “bardhekaltër” e mposhtën në gjysmëfinale Rahovecin me rezultat të ngushtë 89:84. 

Takimi nisi i baraspeshuar me dy skuadrat që treguan vendosmëri për të triumfuar dhe për t’u kualifikuar në finalen e madhe të Superkupës.

Prishtina kishte epërsi deri në katër pikë, por në fund Rahoveci nuk u dorëzua dhe arriti të barazojë rezultatin në 73:73, 10 sekonda para fundit të ndeshjes.

Në sekondat e mbetura, Prishtina kishte edhe një aksion, por gjuajtja e Fisnik Rugovës nuk ishte e saktë dhe sfida shkoi në vazhdime.

Në vazhdime, Prishtina u tregua më e vëmendshme dhe në fund arriti ta fitojë takimin me rezultat 84:89.

Te skuadra e Rahovecit më të dalluarit ishin Isiah Traylor me 26 pikë e tetë kërcime dhe Marvin Jones me 32 pikë.

Në anën tjetër, te skuadra kryeqytetase më të dalluarit ishin Arian Qallaku me 29 pikë dhe 10 kërcime, Fisnik Rugova me 15 pikë e 14 kërcime dhe Altin Morina me 17 pikë.

Prishtina në finale do të takohet me fituesin e duelit Ponte Prizreni – Bashkimi.