Reperi DMX po bashkëpunon me Bonon në një këngë të re
BKT
Magazina

Reperi DMX po bashkëpunon me Bonon në një këngë të re

Reperi DMX ka zbuluar se është duke e bërë gati një bashkëpunim me yllin e muzikës rok, Bono. Kënga titullohet “Skyscrapers”.

Gjatë një interviste të fundit, reperi diskutoi për albumin e tij të shumëpritur që njëherësh e shënon rikthimin e tij në muzikë, dhe i cili do të përfshijë bashkëpunime me disa artistë të njohur, përfshirë këtu vokalistin e bendit “U2”.

“Është çmenduri. Kënga është verore dhe ta jep ndjesinë e Miamit, prandaj edhe po mendoj ta xhiroj videoklipin e saj këtu”, citohet të ketë thënë DMX.

Reperi bëri të ditur se me Bonon e kishte njoftuar Swizz Beatzi, miku dhe bashkëpunëtori i tij i kamotshëm i cili gjithashtu është producent ekzekutiv i albumit të ardhshëm të tij.

Albumi ende i patitulluar i DMX-it vjen pas atij të vitit 2012, “Undisputed”, dhe mysafir në këngët e tij janë emra të njohur të hip-hopit, si Lil Wayne, Snoop Dogg, Alicia Keys, Usher, disa anëtarë të grupit “Griselda” dhe reperi i ndjerë Pop Smoke.

Ndër këngët më të pëlqyera të reperit DMX mbesin: “X Gon Give It To Ya”, “Party Up In Here”, “Head Up”, “Where Da Hood At”, “Ruff Ryders Anthem” dhe të tjerë.

Kurse për muzikantin e rokut, Bono, ky nuk do të jetë bashkëpunimi i parë me një artist nga skena e repit dhe hip-hopit. Në vitin 2010 ai dhe kitaristi i grupit “U2”, The Edge, bashkëpunuan me yjet Jay-Z dhe Rihanna, në realizimin e këngës “Stranded (Haiti Mon Amour)”, ndërsa në vitin 2005 ylli i muzikës rok e ri-incizoi hitin e tij “One”, me hip-hop artisten e njohur Mary J. Blige. Edhe sot, ky mbetet një nga versionet më të dëgjuara dhe të pëlqyera të këngës “One”, për publikun mbarëbotëror.


MË SHUME NGA Magazina