Lajçak: Kurti e Vuçiq konfirmuan se s’ka rrugë tjetër pos normalizimit
Emisari i posaçëm i Bashkimit Evropian për dialogun Kosovë-Serbi, Miroslav Lajçak, pas takimit të sotëm në Bruksel me kryeministrin e Kosovës, Albin Kurti dhe presidentin e Serbisë, Aleksandar Vuçiq, ka thënë se ky takim nuk ishte i lehtë, por me rëndësi që ndodhi.
Sipas tij, BE dhe popujt e të dy vendeve kanë pritje të mëdha nga dialogu në Bruksel.
“Ky ishte takimi i parë me kryeministrin Kurti. Nuk ishte takim i lehtë, por me rëndësi që ndodhi. Të dy liderët patën diskutim të hapur secili se çka do nga dialogu. Ajo çfarë është e rëndësishme nga BE-ja është që të dy liderët konfirmuan se s’ka rrugë tjetër pos normalizimit të raporteve. Që të dy u zotuan për punë për arritjen e marrëveshjes së përgjithshme, nëpërmjet dialogut. Dialogu do të vazhdojë në fund të korrikut. BE-ja ka pritje të mëdha për të tejkaluar trashëgiminë e kaluar dhe që Serbia e Kosova të drejtohen kah e ardhmja evropiane nëpërmjet marrëveshjes gjithëpërfshirëse obliguese”, ka thënë Lajçak.























