PD e gatshme për reformë të re zgjedhore
BKT
Shqipëri

PD e gatshme për reformë të re zgjedhore

Partia Demokratike është e gatshme për reforme të re zgjedhore. Kështu deklaroi anëtari i Kryesisë së Partisë Demokratike dhe deputeti i zgjedhur, Oerd Bylykbashi.

Z. Bylykbashi deklaroi se duhet një ndryshim rrënjësor i sistemit zgjedhor dhe ashpërsim i ligjeve që ndalojnë keqpërdorimin e burimeve shtetërore.

Ai sqaroi se reforma e ardhshme zgjedhore nuk do të ketë fokus Kodin Zgjedhor, pasi sipas tij problemi lind me mënyrën se si përdoren fondet publike, se si rekrutohet administrata publike me kontrata të përkohshme, se si përdoren tenderët dhe se si përdoret policia.

“Fokusi i reformës zgjedhore do të jetë se si të vendosim një perimetër sanitar, si mund të imunizojmë procesin zgjedhor nga ndërhyrja e paligjshme e shtetit militant”, u shpreh z. Bylykbashi.

Ai komentoi edhe vendimin e Gjykatës Kushtetuese për herësin në shpërndarjen e mandateve për deputetë, ku tha se me këtë vendim sistemi zgjedhor është bërë i papërdorshëm, njofton euronews.albania.

“Ajo formulë nuk ka hapur listat, përkundrazi tregon që i ka mbyllur edhe më shumë listat”, u shpreh ndër të tjera Bylykbashi, ku shtoi se ky nen është i pazbatueshëm.

Deputeti i zgjedhur i PD-së nënvizoi se duhet të krijohet një sistem zgjedhor që prodhon balanca të ndryshme politike.


MË SHUME NGA Shqipëri