Shpërthime bombolash gazi në Elbasan dhe Durrës, një e plagosur
Dy shpërthime bombolash gazi janë regjistruar mëngjesin e sotëm në Elbasan dhe Durrës duke lënë të paktën një person të plagosur.
Euronews Albania mëson se pranë Poliklinikës së Specialiteteve në Elbasan shpërtheu një bombol gazi e një byrektoreje. Fatmirësisht nga shpërthimi nuk ka pasur persona të lënduar, por vetëm dëme materiale.
Ndryshe ka ndodhur në banesën e 70-vjeçares S.M në Durrës, ku shpërthimi i bombolës e ka lënë të plagosur. E moshuara është dërguar në spital.
Prej kohësh bombolat e amortizuara të gazit janë kthyer në rrezik për qytetarët. Gjatë dy viteve të fundit kanë ndodhur 17 aksidente nga shpërthimi i tyre në Shqipëri.
Ngjarja më e rëndë ka qenë ajo e Velipojës, ku nga shpërthimi i disa bombolave gazi humbi jetën një 19-vjeçare, si dhe u plagosën rëndë 3 anëtarët e tjerë të familjes, të cilët ndodhen në Itali për një mjekim më të specializuar. Shkak i shpërthimit ishte rrjedhja e gazit.
Përdorimi i gazit për ngrohje, gatim apo makina është rritur gjatë pesë viteve të fundit, rreth 152 mijë tonë.
Gjatë vitit që shkoi, u futën në vend rreth 1 milion bombola në Shqipëri, ndërsa, numri i impianteve për makina është rreth 10 mijë.























