Qeveria i kalon sërish pronën e teatrit Bashkisë së Tiranës, por me kushte
BKT
Shqipëri

Qeveria i kalon sërish pronën e teatrit Bashkisë së Tiranës, por me kushte

Qeveria nuk ka pritur që të mbushet një muaj nga vendimi i Gjykatës Kushtetuese, por ditën e fundit të punës të muajit korrik në një mbledhje të drejtuar nga zëvendëskryeministri Erjon Braçe, Këshilli i Ministrave ka miratuar vendimin që i kalon Bashkisë së Tiranës prona e Teatrit Kombëtar.

Në vendim thuhet se Bashkisë Tiranë i ndalohet të ndryshojë destinacionin e pasurisë së përcaktuar në pikën 1 të këtij vendimi, ta tjetërsojë atë, apo t’ua japë të tretëve në përdorim.

VENDIMI

Kalimin në pronësi të Bashkisë Tiranë të pasurisë nr.1/241, lloji “truall”, në  zonën kadastrale 8150, Tiranë, me sipërfaqe totale 5  522.7 (pesë mijë e pesëqind e njëzet e dy pikë shtatë) m2 , me adresë: rruga “S. Toptani”,  Tiranë, sipas kartelës së pasurisë dhe fragmentit të hartës kadastrale, që i bashkëlidhen këtij vendimi. Bashkisë Tiranë i ndalohet të ndryshojë destinacionin e pasurisë së përcaktuar në pikën 1 të këtij vendimi, ta tjetërsojë atë, apo t’ua japë të tretëve në përdorim. Pasuria e përcaktuar në  pikën 1 të këtij vendimi, i shtohet listës përfundimtare të  pjesshme të pronave të paluajtshme publike shtetërore, miratuar me vendimin nr.219, datë 21.3.2017, të Këshillit të Ministrave, “Për miratimin e listës përfundimtare të pjesshme (pjesa e parë + pjesa  e dytë) të pronave të paluajtshme publike shtetërore, që  transferohen në pronësi ose  në përdorim të njësisë administrative Tiranë, Bashkia Tiranë, të qarkut të Tiranës”, të  ndryshuar.  Ngarkohen Ministria e Kulturës, Bashkia Tiranë dhe Agjencia Shtetërore e Kadastrës për zbatimin e këtij vendimi. Ky vendim hyn në fuqi pas botimit në Fletoren Zyrtare.

REAGIMI

Ndërkohë, pas vendimit të Këshillit të Ministrave me në krye zëvendëskryeministrin Erjon Braçe, ka reaguar edhe kryebashkiaku i Tiranës, Erjon Veliaj. Nga Tokio, Erion Veliaj, u shpreh gjatë një interviste për “News 24” se, vendimi është korrektuar sipas vendimit të Gjykatës Kushtetuese.

Kryebashkiaku sqaron se vendimi i Këshillit të Ministrave nuk bie ndesh  me atë të Gjykatës Kushtetuese. “Është reflektim i vendimit të Gjykatës Kushtetuese për ta bërë siç duhet  VKM-në e Teatrit, duke qenë se teatri i vjetër fizikisht nuk ekziston është vetëm trualli ai që kalon dhe jo trualli me një ndërtesë që tani nuk ekziston më. Është korrektuar si- pas Gjykatës Kushtetuese  kalimi i pronës te Bashkia e Tiranës që na mundëson të vazhdojmë me procedurat për ndërtimin e Teatrit.

Nuk bien ndesh me njëra-tjetrën vendimet e qeverisë me vendimin e Gjykatës Kush- tetuese. Meqë jemi në Tokio, ajo që kam kuptuar në vende të tilla është që kombet ecin përpara kur nuk bllokohen projektet e mëdha. Stadiumi këtu nuk është aq ndryshëm apo më i madh dhe më i bukur se Arena Kombëtare. Diferenca është që ne i bëjmë  ndryshimet me shumë dhimbje. Stadiume si ky bëjmë dhe  ne, e kemi bërë në Tiranë”, tha Veliaj. Por nga ana tjetër, për demokratët vendimi i qeverisë  për truallin e teatrit konfirmon arrogancën e Kryeministrit Rama.

Sipas deputetes së  zgjedhur Albana Vokshi, vendimi i qeverisë është kundër vendimit të Kushtetueses, por sipas saj, kjo gjë nuk është në  interesin e Kryeministrit. “Vendimi i qeverisë për të  kaluar tokën e Teatrit Kombëtar në pronësi të Bashkisë  së Tiranës është një akt tjetër poshtërues për qytetarët dhe  Gjykatën Kushtetuese. Vendi- mi i pak javëve më parë nga  Gjykata Kushtetuese thotë qartë se vendimi i qeverisë i një viti më parë për të kaluar Teatrin në pronësi të Bashkisë së Tiranës ishte anti- kushtetues, në dëm të  trashëgimisë kulturore kombëtare.

Vendimi do të thotë se Edi Rama nuk pyet për institucionet e reja të drejtësisë, kur vendimet e tyre pengojnë planet e tij korruptive me tokën e Teatrit Kombëtar. PD-ja e ka thënë që prej ditës së  parë se Edi Ramës, nuk i intereson një Teatër i ri Kombëtar, por vetëm trualli i tij, të cilin e sheh si burim për të përfituar para dhe pasuri të paligjshme”, shkroi Vokshi./panorama


MË SHUME NGA Shqipëri