Rama: Hapa dyert e Shqipërisë për refugjatët afganë
Blogu italian dhe ndërkombëtar i lajmeve “Huffington Post” (HP), i ka dedikuar një artikull kryeministrit të Shqipërisë, Edi Rama dhe situatës së afganëve, të cilët kanë mbërritur gjatë 48-orëve të fundit.
HP-ja e konsideron fillimisht Ramën – një politikan jokonvencional.
“Dy metra i gjatë, pothuajse gjithmonë vesh atlete, ka luajtur për ekipin kombëtar të basketbollit shqiptar dhe është një artist”, shkruhet në artikull.
Me një italishte të shkëlqyer, cilëson HP-ja, Rama prezantohet në një mënyrë energjike dhe karizmatike.
Pavarësisht angazhimit të tij politik ai vazhdon të vizatojë dhe të pikturojë.
“Në prill ai fitoi zgjedhjet politike për të tretën herë radhazi, një ngjarje unike që kur Shqipëria iu kthye demokracisë, duke marrë një shumicë absolute të vendeve”, thekson më tej HP-ja.
Huffington Post sqaron se Rama ka fituar çmimin për kryebashkiakun më të mirë në botë në vitin 2004 (duke mposhtur në finale Manuel Lopez Obrador, tanimë President i Meksikës, dhe Walter Veltroni, Kryebashkiaku i atëhershëm i Romës).
“Evropianist dhe internacionalist”, kështu e përshkruan HP-ja, Ramën.
Por për HP-në rëndësi përbën lajmi që qeveria e tij ishte e para në botë që i dha azil refugjatëve afganë.
Ky gjest, sipas tyre, është vlerësuar shumë në nivel global, me BBC-në dhe CNN që e kanë lavdëruar.
Gjesti
“E di që të thuash kështu mund të tingëllojë patetike për ata që mendojnë ndryshe, por për fat për shumicën dërrmuese të shqiptarëve kjo tingëllon e natyrshme”, deklaron fillimisht Rama.
Kryeministri sjell në vëmendje faktin që jemi i vetmi vend evropian që kishte më shumë hebrenj në fund të Luftës së Dytë Botërore para luftës, sepse “për shqiptarët nuk kishte asgjë që të bënte më shumë çnderim sesa të largoheshin dhe t’i linin në duart e vdekjes”.
“Ne jemi të diktuar nga historia jonë, kujtesa jonë dhe gjithashtu kodi ynë i parë i ligjeve, Kanuni (Kanuni) i Shqiptarëve: “Shtëpia e Shqiptarit është e Zotit dhe e Vizitorit”, shton më tej Rama.
Duke shkuar tek situata e afganëve, Rama kujton që Kanuni përmban një kapitull të gjatë mbi mikpritjen.
“Thuhet se ai që nuk i hap derën Tjetrit në kërkim të ndihmës është i mallkuar përgjithmonë dhe do të jetojë i vetëm deri në vdekje, sepse nuk do të pranohet në asnjë vend apo ngjarje publike, përveçse në funeral”, vijon Rama deklaratën për HP-në.
Ndërkaq, kryeministri nënvizon se dhe shqiptarët në të kaluarën kanë marrë shumë – jo shumë vite më parë, “kur ishim afganët që u shfaqëm në brigjet e Italisë”.
“Falë mbi të gjitha italianëve”, vijon Rama, “ai makth i së kaluarës është histori, ndërsa sot shqiptarët kontribuojnë në Itali si qytetarë plotësisht të integruar dhe vendi amë gjithashtu përfiton shumë”.
Dalja nga Ferri
Në lidhje me pritjen, Rama e përshkruan daljen prej Kabul-it “si të hapësh dyert dalëse të Ferrit”.
“Pas ditëve dhe netëve të fluturimeve të shpallura dhe të anuluara, më në fund kanë mbërritur të parët, pak më shumë se njëqind”, shpjegon Rama.
Kryeministri tregon për HP-në se afganët e ardhur u vendosën në bregdetin e Durrësit, në ambientet e hotelit të vëna në dispozicion të tyre.
“Ne vendosëm t’i akomodonim në objektet e hoteleve (siç bëmë me qytetarët tanë pas tërmetit) sepse donim që ata të merrnin frymë sa më shumë nga normaliteti dhe të mos i izolonin ata në kampet e refugjatëve që rrezikojnë të çnjerëzohen dhe të rrisin pakënaqësinë dhe ndarjet”, thekson kryeministri në lidhje me zgjedhjen e hoteleve.
Sipas Ramës, kjo nuk është hera e parë që Shqipëria ndihmon ata në nevojë.
Kryeministri rikujtoi mbërritjen e stafeve mjekësore shqiptare gjatë fazës më të vështirë të COVID-it në Itali, vitin e kaluar.
“Siç u përpoqa të shpjegoj më herët, për ne ka të bëjë me identitetin tonë, kush jemi, por gjithashtu ka të bëjë me atë që duam të jemi”, thotë Rama më tej.
Për kryeministrin, ne – referuar autoriteteve dhe popullit shqiptar – duhet të mendojmë për atë që duam t’u lëmë trashëgim brezave të ardhshëm në një botë ku historia jonë na ka mësuar se ka një kohë për të kërkuar ndihmë dhe një kohë për t’i dhënë asaj.
“Si mund të harrojmë atë që bëri Italia për ne duke na shpëtuar në kohë të errëta dhe të dhimbshme, duke parë sesi Italia vetë u dogj nga dhimbja dhe nuk mund të merrte frymë nën presionin e jashtëzakonshëm të virusit?”, kujton Rama.
Me bindje, kryeministri shton se me siguri, ata 30 mjekë dhe infermierë tanë nuk ishin aspak të mjaftueshëm për të shuar të gjitha shpërthimet që mbuluan Italinë, “por ne donim të ishim pranë jush, të ishim pjesë e përpjekjes suaj të madhe për të pasur sukses, dhe për të treguar solidaritetin dhe mirënjohjen tonë jo vetëm me fjalët”.
COVID-19
Sa i takon pandemisë dhe variantit të ri të COVID-19, Rama deklaron se Shqipëria është e pajisur mirë, veçanërisht nga pikëpamja psikologjike, sepse koha e tërbimit të virusit dhe tmerrit të befasisë është prapa nesh, edhe nëse duket se së shpejti do të festojmë fundin e këtij Armiku të egër të padukshëm.
“Do të na japë akoma një kohë të vështirë dhe pa u kthyer në kundërmasat e egra të mëparshme, ne duhet të vazhdojmë me durim të luftojmë për të shpëtuar jetë dhe për të mbajtur infeksionin nën kontroll”, ravijëzon kryeministri.
Rama shtoi se autoritetet shqiptare do të vazhdojnë të monitorojnë situatën përmes komitetit të ekspertëve të Shëndetit Publik.
“Do të përpiqemi të jemi pragmatikë, duke marrë vendime bazuar në përvojën e grumbulluar dhe të dhënat shkencore në dispozicion”, garantoi Rama.
Duke përdorur citatin e ish-presidentit të Shteteve të Bashkuara, Donald Trump, “është ajo që është” – Rama shtoi se kudo do të ishte më mirë nëse virusi nuk do të përdorej për imazhin e politikanëve apo teknikëve.
Lidhur me aktivizmin “anti-vaksinë” ose ndryshe anti-vaxxers, Rama u shpreh se ka edhe në Shqipëri ata që besojnë në komplotin e forcave okulte për të monitoruar trurin tonë përmes vaksinave ose në teori të tjera komplotesh qesharake kundër të tjerëve.
“Ne jemi shumë aktivë me fushatën që fton të gjithë qytetarët të vaksinohen, duke u përpjekur të shpjegojmë pse është e rëndësishme si për veten e tyre ashtu edhe për të tjerët dhe mjaft të kënaqur me atë se si ka shkuar deri më tani, me një shumicë të mirë të të rriturve të vaksinuar”, shtoi kryeministri Rama.
Mandati i tretë
Sa i takon prioriteteve të mandatit “Rama 3”, kryeministri listoi për HP-në një listë pikësynimesh të qarta.
E para për kryeministrin është dalja më “të fortë” nga tërmeti shkatërrues që goditi Shqipërinë dhe nga pandemia që erdhi menjëherë pas saj.
Më tej, ai shton investimet në energjitë e rinovueshme – për t’u kthyer në një vend eksportues neto të energjisë në listën e prioriteteve.
Mbyllja e rrethit të digjitalizimit të shërbimeve publike, është hallka tjetër prioritare, sipas Ramës.
Kjo, për të mbyllur të gjitha dyert e burokracisë torturuese dhe për ta përfunduar atë me të gjitha llojet e dosjeve të pritjes.
Këtë vit, shton Rama duke futur kurrikulën e gjuhës angleze në klasën e parë dhe duke transformuar të gjithë sistemin e njohurive të teknologjisë në shkollë, këto do të jenë prioritetet në arsim.
Transformimi i tre porteve të vjetra tregtare në porte turistike dhe ndërtimi i dy aeroporteve të reja për ta çuar turizmin në një nivel tjetër, duke u përpjekur të shmangim gabimet e së kaluarës në zhvillimin e bregdetit, apo edhe rritja e eksporteve bujqësore.
Kryeministri shton se të gjithë këto janë prioritare, por pa harruar kurrë se “korrupsioni dhe burokracia paralizuese duhet të trajtohen pa pushim si armiq të sundimit të ligjit dhe të drejtave të qytetarëve dhe se zhvillimi i vendit duhet të jetë zhvillim i qëndrueshëm dhe t’u shërbejë objektivave afatgjata të drejtësisë sociale”.
Shqipëri-Itali
Duke iu kthyer afërsisë me Italinë, Rama shpjegon më tej për HP-në se Shqipëria është një vend “vëlla më i vogël i Italisë” dhe për shqiptarët Italia ka qenë dhe gjithmonë do të jetë e veçantë.
“Do të ishte e pamundur të numëroheshin të gjitha fragmentet e Italisë që mbushën jetën tonë dje dhe sot, por mjafton të përmendim këtu se finalja fitimtare në Wembley mbushi sheshin e kryeqytetit tonë me gëzim dhe trengjyrësh për të kuptuar se zemra jonë bëhet gjithmonë blu kur ka një gëzim italian dhe gjithashtu një dhimbje italiane në mes”, deklaroi kryeministri.
Për Ramën – duke lënë shakatë mënjanë – do të ishte e padrejtë të thuhet se Italisë i ka munguar vëmendja ndaj nesh dhe unë them se në gjithë këto vite si kreu i qeverisë “nuk kam ndjerë kurrë ndonjë qeveri tjetër më afër Shqipërisë sesa ajo italiane”.
“Italia ka bërë gjithmonë pjesën e saj, ne nuk mund të shpresojmë të kemi një avokat më të mirë në Bruksel që na përfaqëson me disponueshmëri të madhe dhe që është gjithmonë në anën tonë”, u shpreh Rama mbi raportet me Italinë për aderimin në Bashkimin Evropian.
Rama rrëfen për HP-në se mbetet i kënaqur me marrëdhëniet e krijuara me kalimin e kohës me politikanët italianë – për ta thënë në shaka, “unë jam një mik i të dy Mattei pavarësisht nga Ungjijtë e tyre shumë të ndryshëm”.
Presidentin D’Alema, Rama e ka konsiderur ndër të tjera si një mik shumë të dashur shumëvjeçar të Shqipërisë dhe marrjen e këshillave prej tij si një garanci në thellimin e analizave të tij.
“Por pa bërë shumë përjashtime do të shtoja se Luigi Di Maio gjithmonë më bën të ndihem në borxh sepse ai nuk është vetëm dhe thjesht i disponueshëm kur është fjala për Shqipërinë, por ai e bën atë sikur tonat të ishin problemet e shtëpisë së tij”, thekson Rama.
Sa i takon kryeministrit italian, Mario Draghi, Rama tregon se e ka takuar vetëm një herë në Bruksel, në Samitin e NATO -s dhe shpreson shumë që ta shohë përsëri së shpejti.
BE
Sa i takon BE-së dhe vendimeve të saj, Rama konsideron se nuk bëhet më fjalë për ne dhe atë që bëjmë, por për ata dhe atë që i mundon.
“Bashkimi është në një ngërç me shenja mjaft shqetësuese të ndarjeve dhe coptimeve të dukshme të brendshme. Duket se që nga kriza e madhe e refugjatëve e konfliktit në Siri ajo ka humbur jo vetëm një pjesë të hijeshisë së saj të madhe, por edhe busullën e saj të orientimit kur bëhet fjalë për të menduar për zgjerimin në Ballkan”, deklaron Rama për situatën e BE-së.
Sipas mendimit të Ramës, ky është shembulli më i qartë i të qenit peng i nacionalizmave në shtëpinë e tij, për të cilin të vjen keq sepse është një projekt i lindur pikërisht për të luftuar këto nacionalizma.
“Në Ballkan ne ecnim në vaska gjaku dhe gropa të zakonshme”, përshkruan Rama situatën e kahershme për të treguar zhvillimin e raporteve në rajon mes vendeve.
Sipas kryeministrit për ne – referuar popujve dhe shteteve të Ballkanit -Evropa është ende një qëllim për të ndjekur, duke pasur parasysh të kaluarën e luftërave botërore dhe miliona jetëve të humbura që e kanë bërë atë që ishte në vizionin e etërve themelues, një hapësirë demokratike të paqes, drejtësisë dhe bashkëpunimi midis popujve, jo një bankomat ose një ligë egoizmi kombëtar.
Në përmbyllje, Rama, ceku dhe pjesëmarrjen e tij në Otranto më 3 shtator.
Kjo, sepse sipas kryeministrit, nuk mund të themi kurrë mjaftueshëm faleminderit – Italisë vëllazërore – për pritjen që iu bë shqiptarëve tridhjetë vjet më parë, një shembull i bujarisë që duhet të frymëzojë gjithashtu debatet e sotme në botën tonë mbi mikpritjen dhe emigracionin.
/Albanianpost.com























