Covid-19, 30 humbje jete në 1 javë në Shqipëri
Në shtatë ditë 30 humbje jete. Ky është bilanci që ka shkaktuar Covid 19 në Shqipëri nga 11 shtatori deri më 17 shtator duke e çuar numrin e viktimave të raportuara nga Ministria e Shëndetësisë që prej fillimit të pandemisë në 2569 persona.
Të enjten dhe të premten u shënua dhe numri më i lartë i vdekjeve si pasojë e koronavirusit pas disa muajsh, prej 6 personash. Mosha e viktimave të kësaj jave ka variuar nga 49 në 86 vjeç.
Tirana qëndron në krye të qyteteve me numrin më të lartë të humbjeve të jetëve në një vit e gjysmë, 1032. Afro 4 fish më shumë se Elbasani që renditet në vend të dytë me 266 vdekje. Me pak viktima si pasojë e koronavirusit ka Kukësi dhe Dibra.
Javën e fundit rritje të ndjeshme ka pësuar dhe numri i pacientëve që kanë nevojë për trajtim spitalor.
Nga 175 të shtruar që Ministria e Shëndetësisë raportoi më 11 shtator numri i tyre ka arritur në 215. Sipas mjekëve ditët e fundit është vënë re shtim i pacientëve në moshë të re dhe të pavaksinuar që paraqiten në spital në gjendje të rënduar shëndetësore.























