Kupa e Kombeve të Afrikës: Mësoni gjithçka rreth këtij kompeticioni
Sot në orën 17:00 do të startojë Kupa e Kombeve të Afrikës, me sfidën hapëse Kamerun-Burkina Faso.
Turnamenti do të zgjasë një muaj, pikërisht në shtetin e Kamerunit dhe pritet të jetë një muaj plot spektakël për futbollin.
Shumë yje të futbollit botëror do të jenë pjesë në këtë turne duke filluar me Muhamed Salah, yllin e Liverpool dhe liderin e Egjiptit.
“Faraoni” është një nga lojtarët më të mirë në botë për momentin dhe prej këtij fakti kërkon ta udhëheqë kombëtaren e tij drejt lavdisë.
Por Salah nuk është i vetmi që kërkon të arrijë këtë trofe. Sadio Mane, Eduard Mendi, Nabi Keita, Rijad Mahrez, Oubamejang etj. janë disa nga yjet e Premier Ligës që do të jenë pjesë e turnamentit.
Gjithashtu dhe yje të tjerë botëror duke filluar me Ashraf Hakimin, Kalidu Kulibali, Andre Onana etj. do të kërkojnë fitimin e turnamentit.
Pretendenti kryesor për ta fituar këtë kompeticion është Senegali. Me shumë yje në ekip dhe finalist e herës së fundit, vlerësohet si kombëtarja që duhet mundur në këtë turne.
Pas tyre vijnë kampionët në fuqi të Algjerisë dhe më pas Bregu i Fildishtë dhe organizatorët e Kamerunit.
Kupa e Kombeve pritet të dhurojë spektakël ashtu siç ka dhuruar gjithmonë dhe kësaj radhe duket se asnjë ekip nuk duhet nënvlerësuar, pas paraqitjeve të tyre në kualifikueset e Botërorit Katar 2022.























