Kurti: Masakra e Rezallës, dëshmi e gjenocidit serb në Kosovë
BKT
Lajme

Kurti: Masakra e Rezallës, dëshmi e gjenocidit serb në Kosovë

RTKlive

Sot mbushen 23 vjet nga masakra në Rezallë të Skenderajt, ku nga ushtria dhe policia serbe u ekzekutuan 98 shqiptarë, banorë të Rezallës dhe fshatrave përreth, nga të cilët 44 ishin munduar t’i zhdukin.

Kryeministri Albin Kurti i cili sot bëri homazhe në Rezallë, tha se Masakra e Rezallës është dëshmi e gjenocidit të Serbisë që ka kryer në Kosovë.

Ai ka kërkuar nga drejtësia vendore edhe ajo ndërkombëtare që me ngulm të veprojnë në mënyrë që përgjegjësit të gjykohen e dënohen për këto krime.

“98 burra dhe djem u grumbulluan dhe u ekzekutuan nga forcat serbe. Kjo masakër është dëshmi e gjenocidit të Serbisë në Kosovë. Para disa muajve u patën riva varrosur këtu 9 kufoma të 9 martirëve. Pas ekzekutimit kufomat u patën dërguar në serbi. Pra me ekzekutim mizor ua vodhën jetën e pastaj edhe kufomat. Gjenocidi i Serbisë njihet botërisht andaj edhe drejtësia vendore edhe ajo ndërkombëtare duhet me ngulm të veprojnë në mënyrë që përgjegjësit të gjykohen e dënohen. Lavdi dëshmorëve dhe martirëve të kombit”, tha Kurti.

Kurti ishte i shoqëruar me ministrin e Mbrojtjes, Armend Mehaj dhe komandantin e FSK-së, Bekim Jasharin.

Ndryshe një pjesë e trupave u gjenden në Rudnicë të Rashkës dhe iu dorëzuan familjarëve. Më 5 prill të vitit 1999 serbët rrethuan shtëpitë e këtyre familjeve dhe pushkatuan pothuajse të gjithë burrat dhe djemtë e rinj.

Nga masakra në Rezallës vetëm tre kanë shpëtuar të gjallë. Kjo masakër konsiderohet si një ndër masakrat më të pamëshirshme gjatë luftës në Kosovë.

 


MË SHUME NGA Lajme