Lavatriqe me `para` janë vendosur para Qeverisë nga aktivistë të PSD-së
Venera Xhoxhaj/ RTK
Zgjim Hyseni nga PSD-ja ka thënë se qëllimi i aksionit është përshkrimi i situatës së krijuar ditëve të fundit me siç ka thënë ai shpëlarjen e parasë ditëve të fundit.
"Po bëhen një javë prej se ka ndodh skandali me ambasadorin e Kosovës në Kroaci dhe krejt pyesin e flasin por vetëm institucionet dhe eprorët e ambasadorit po heshtin. Dmth Ambasadori Martin Berishaj e ka hap një xhirollogari me vetëm veten e tij të punësuar dhe ka bërë tërheqje 600 mijë euro. Paret në dorë e pastaj në strajcë. Prejardhja e pareve Beogradi. Na e dimë që kushdo që bën tregti me Beogradin pavarësisht cila është kompania është e vështirë mos me ra në rrjetën monopol të së ashtuquajturës mafi energjetike të Ballkanit" ka thënë Hyseni.
Ai ka theksuar kjo aferë nuk është e izoluar bazuar në atë se udhëheqësit e KEK-ut kanë qenë bashkë dhe kanë bërë negociata atje.
"Ata e pranuan vetë e këta njerëz nuk janë të PAN-it. Pra ky nuk është rast i izolim. Prandaj secila ditë që kalon e ambasadori rri në detyrë ne kemi të drejt me besuar se edhe Presidentja edhe Kryeministri Kurti janë të lidhur me këtë punë ndryshe s’ka kuptim heshtja", tha ai.























