Kroacia e gatshme ta ndihmojë Kosovën në procesin e integrimit
BKT
Foto: ZKM
Lajme

Kroacia e gatshme ta ndihmojë Kosovën në procesin e integrimit

Blerim Halimi / RTKlive

Kryeministri Albin Kurti ka pritur sot në takim një delegacion të Komisionit për Integrime Evropiane nga Kroacia, të udhëhequr nga Domagoj Hajduković. Në takim ishte edhe deputetja Ermina Lekaj Prljaskaj, kryetare e Grupit Parlamentar të Miqësisë Kroaci-Shqipëri.

Me këtë rast Kurti e falënderoi delegacionin parlamentar kroat për vizitën, derisa i njoftoi për të arriturat e qeverisë në fushën e ekonomisë, në avancimin e demokracisë dhe menaxhimin e mirë të pandemisë.

Duke folur për marrëdhëniet e shkëlqyera ndërmjet dyja vendeve, kryeministri Kurti njëkohësisht e falënderoi Kroacinë për bashkëpunim, sidomos në fushën e sigurisë.

Në këtë takim shumë miqësor, kryeministri Kurti po ashtu kërkoi bashkëpunim e mbështetje për anëtarësimin e Kosovës në Këshill të Evropës dhe në Partneritetin për Paqe të NATO-s, por edhe në procese tjera në të cilat Kroacia ka përvojë edhe ekspertizë, thuhet në njoftimin e Zyrës së Kryeministrit.

Nga ana tjetër, kryetari i këtij komisioni Domagoj Hajduković e falënderoi kryeministrin për mikpritjen. Gjatë diskutimit rreth agresionit rus në Ukrainë, kryetari Hajduković vlerësoi pozicionimin e qartë të Kosovës në sanksionimet e vendosura ndaj Rusisë duke thënë se nuk është koha për të qenë neutral.

Teksa theksoi bashkëpunimin e shkëlqyer mes Kroacisë dhe Kosovës, z. Hajduković shprehu mbështetjen dhe përkrahjen e shtetit kroat për anëtarësimin e Kosovës në Këshill të Evropës dhe ndihmën për proceset integruese të Kosovës në Bashkimin Evropian. Ai propozoi që të nënshkruhet një Memorandum bashkëpunimi mes Komisionit për Integrimeve Evropiane në Parlamentin e Kosovës dhe Komisionit për Integrimeve Evropiane në Parlamentin e Kroacisë për të ndihmuar anëtarësimin e Kosovës në Bashkimin Evropian.

Në takim u bisedua edhe për komunitetin shqiptar në Kroaci dhe atë kroat në Kosovë dhe për krijimin e mundësive dhe shanseve të barabarta për zhvillim dhe jetë më të mirë.​​


MË SHUME NGA Lajme