Presidentja Osmani viziton një nga impiantet e paneleve solare në Singapor
Kimete Kasumi
Presidentja Vjosa Osmani, nëpërmjet një postimi në Facebook, ka bërë me dije se sot ka vizituar njërin nga impiantet më të mëdha të paneleve solare lundruese në botë i cili gjendet në Singapor.
“Me një kapacitet prej 60 MWp, një sipërfaqe prej 45 hektarësh e 122 000 paneleve lundruese, projekti i kompanisë Sembcorp furnizon me energji pesë impiantet lokale të trajtimit të ujit të Singaporit, duke e bërë vendin një nga vendet e pakta në botë që ka një sistem ujësjellësi 100 % të gjelbër”, u shpreh presidentja Osmani.
Sipas saj, ky projekt është shembull ideal se si kombinohen inovacioni, teknologjia e mbrojtja e mjedisit në dobi të zhvillimit dhe mirëqenies së shtuar - një model për t’u ndjekur nga të gjithë përderisa punojmë për tranzicionin energjetik.
"E ardhmja e gjelbër dhe zhvillimi i qëndrueshëm qëndrojnë në boshtin e konceptit zhvillimor të Singaporit", përfundon ajo.

























