Eurodeputeti Mandl: Kosova fitoi lirinë me gjak, tani vendi ka bërë progres
BKT
Foto: Likas Mandl/Twitter
Lajme

Eurodeputeti Mandl: Kosova fitoi lirinë me gjak, tani vendi ka bërë progres

Jeton Musliu / RTKlive

Lukas Mandl, deputet nga Austria në Parlamentin Evropian, deklaroi sot se Kosova ka paguar me gjak lirinë dhe se Evropa e SHBA-ja e kanë ndihmuar ta fitojë edhe pavarësinë.

Politikani austriak që është një nga mbështetësit e mëdhenj të Kosovës, para votimit të raportit, ku bëhet thirrje për liberalizim të vizave, anëtarësim të vendit në mekanizmat ndërkombëtarë e njohjen nga pesë vendet e BE-së, deklaroi se Kosova është bërë një vend demokratik ku sundon ligji dhe ku ka një Kushtetutë mjaft të fuqishme.

Eurodeputeti Mandl deklaroi se të gjitha shtetet e Ballkanit Perëndimor janë të rëndësishme për të ardhmen e Evropës, megjithatë, u shpreh se në fjalimin e tij, do t’ia kushtojë vetëm Kosovës.

 “Të gjitha shtetet e Ballkanit Perëndimor janë të rëndësishme për të ardhmen e  Evropës”, u shpreh Madel, sipas të cilit, ky vend është bërë demokratik e ka sundim të ligjit.

“Është një demokraci e qëndrueshme dhe vend divers. Po sundimi i ligjit duhet të përmirësohet, por ata kanë një Kushtetutë të fuqishme”, vuri në pah në fjalimin e tij, eurodeputeti austriak.

Duke folur për çështjen e njohjeve për kosovën, eurodeputeti Mandl përmendi faktin që Kosovës ende i mohohet liria e lëvizjes pa viza, raportin RTKlive.

Ai ka thënë se premtimi për viza i dhënë ndaj Kosovës nuk është mbajtur dhe shprehu bindjen se mesazhi që do të përçojë sot Parlamenti Evropian, do të jetë shumë i rëndësishëm.

“Ky vend është njohur nga më shumë se 100 shtete përfshirë edhe Izraelin”, tha Mandl.

“Ky është një vend që ende s’është njohur nga një numër i vogël i vendeve të BE-së. Ky vend është vendi i vetëm i Ballkanit Perëndimor që nuk gëzon lirinë e lëvizjes pa viza”, rikujtoi ai.

“Këtij vendi i janë bërë premtime për këtë, të cilat s’janë mbajtur. Kjo ka ndodhur me Republikën e Kosovës. Por populli i Kosovës e mbështet integrimin në BE, më shumë se të gjitha vendet tjera të Ballkanit Perëndimor”, tha eurodeputeti. 

“Dhe shumë mund të mësohet nga Kosova, kjo demokraci e re në Evropë. Prandaj sinjali i sotëm nga Parlamenti Evropian do të jetë i rëndësishëm”.

Përndryshe, raporti, i miratuar me 469 vota pro, 96 kundër dhe 72 abstenime, rikonfirmon mbështetjen e qartë të Parlamentit edhe për dialogun Serbi-Kosovë të lehtësuar nga BE dhe rithekson rëndësinë e arritjes së një marrëveshjeje gjithëpërfshirëse, ligjërisht të detyrueshme për normalizim, e cila është thelbësore për Serbinë dhe Kosovën, për të avancuar në rrugët e tyre përkatëse evropiane dhe që do të kontribuonte në stabilitetin dhe prosperitetin rajonal.


MË SHUME NGA Lajme