Tahiri:Projektligji për Zyrtarët Publikë sulm ndaj administratës shtetërore
Fadil Sertolli / RTKlive.com
Shefi i grupit parlamentar të AAK-së, Besnik Tahiri, ka reaguar pas procedimit të Ligjit për Zyrtarët Publikë nga ana e Ministrisë së Brendshme.
Me anë të një njoftimi për media Tahiri, këtë projektligj e ka quajtur sulm mbi administratën shtetërore. Sipas tij, Neni 46, Neni 66 dhe Neni 98 te dispozitat kalimtare janë nene kundërkushtetuese.
"Duke e lexuar Projektligjin e ri për Zyrtarët Publik, jam i tmerruar me provizionet që parapërcaktojnë dhe lejojnë hapësirë për ndërhyrje politike në adminstratë publike", thuhet në njoftim.
"Ky Projektligj, qenka një sulm i drejtpërdrejtë ndaj administratës shtetërore dhe shërbimit civil pa përjashtim. Është kundër gjithëçkaje që është arritur me BE-në dhe Sigma në dekadën e fundit".
Tahiri thotë se Projektligji i ri për Zyrtarët Publik, respektivisht Neni 46, Neni 66 dhe Neni 98 te dispozitat kalimtare janë qartazi nene kundërkushtetuese, që në esencë janë fshisë e hekurt kundër menaxhmentit drejtues të administratës shtetërore.
"Ky Ligj nuk duhet të kalojë, assesi!", përfundon Tahiri i AAK-së.























