Garda Kombëtare e Nju Xhersit, mbështetje Forcave të Armatosura
ATSH
Ushtarët e Gardës Kombëtare të Nju Xhersit së fundmi mbështetën dhe trajnuan Forcat e Armatosura Shqiptare gjatë stërvitjes kritike për vlerësimin e gatishmërisë luftarake nga NATO, bëri të ditur sot ambasada e SHBA në Tiranë.
“Ishte shumë e rëndësishme që të kishim Shtetet e Bashkuara këtu, Brigadën e Ndihmës së Forcave të Sigurisë dhe atë të Nju Xhersit së bashku, sepse ne i bëmë të gjitha me këtë ekip”, tha majori shqiptar Enerjol Harka, oficer drejtues me batalionin e 2-të.
“Ata të gjithë na trajnuan dhe na dhanë përvojën e tyre dhe nëse ia dolëm me sukses, ishte falë tyre. Këto janë marrëdhëniet më të mira që mund të kemi”, vijoi ai.
Garda Kombëtare e Nju Xhersit bashkëpunon me Shqipërinë prej më shumë se 20 vjetësh në kuadër të Programit të Partneritetit Shtetëror të Byrosë së Gardës Kombëtare të Departamentit të Mbrojtjes.























