Osmani falënderon Estoninë për mbështetjen e vazhdueshme ndaj Kosovës
N. Mekolli /RTKlive
Presidentja e Kosovës, Vjosa Osmani, gjatë vizitës në New York është takuar me presidentin e Estonisë, Alar Karis.
Bëhet e ditur se në këtë takim u diskutua për thellimin e marrëdhënieve dypalëshe, zhvillimet në rajon e më gjerë, si dhe bashkëpunimin e mëtejmë.
“Presidentja Osmani e falënderoi homologun estonez për mbështetjen e vazhdueshme dhënë anëtarësimit të Kosovës në Këshillin e Evropës dhe në organizatat e tjera ndërkombëtare.
Në takim me presidentin Karis, Presidentja Osmani theksoi përkushtimin e Kosovës për ta avancuar integrimin euroatlantik dhe në të njëjtën kohë shtroi nevojën e përmbylljes urgjente të liberalizimit të vizave”, njofton zyra për informim e Presidentes.
Sa i përket dialogut me Serbinë, presidentja Osmani theksoi se Kosova mbetet palë konstruktive në dialog, i cili synon një marrëveshje përfundimtare, të përqendruar në njohjen e ndërsjellë.
“Në raport me luftën në Ukrainë, Presidentja Osmani ka theksuar se Kosova ka dënuar pa mëdyshje luftën e paprovokuar të Putinit kundër Ukrainës dhe se Kosova është plotësisht në linjë me sanksionet e BE-së dhe SHBA-së kundër Rusisë”, thuhet në njoftim.
Gjithashtu në takim u diskutua edhe për mundësitë e bashkëpunimit strategjik në fushën e digjitalizimit.























