Në Tiranë kërkohen 15 vjet burgim për shtetasin iranian
REL
Personeli i Ambasadës së Republikës Islamike të Iranit shihet prapa një derë e mbyllur, kur Shqipëria ndërpreu marrdhëniet diplomatike me Iranin dhe urdhëroi largimin e diplomatëve të këtij shteti, për shkak të sulmeve kibernetike. 7 shtator 2022. Fotografi ilustruese.
Prokuroria e Posaçme (SPAK) në Tiranë ka kërkuar 15 vjet burgim për shtetasin iranian, Bijan Poladrag. Ai akuzohet për disa vepra penale si: pjesëmarrje në një organizatë terroriste, sulme ndaj sistemit kompjuterik, ndërhyrje në të dhënat kompjuterike të paautorizuara etj.
Shtetasi iranian ka mbërritur në Shqipëri në vitin 2016, si pjesë e një grupi iranianësh që gjetën strehim në kampin e Manzës, ku aktualisht janë të strehuar rreth 3.000 pjesëtarë të Organizatës së Muxhahedinëve të Popullit të Iranit (MEK), pas kërkesës së Shteteve të Bashkuara.
Zyrtarët iranianë i konsiderojnë pjesëtarët e kësaj organizate si terroristë.
Sipas prokurorisë, Poladrag ka banuar për një periudhë të caktuar në kamp, ku vepronte si i infiltruar, ndërsa dyshohet për planifikimin e një sulmi terrorist.
Pas rreth dy vjetësh ai ishte shkëputur nga kampi, pasi mori leje-qëndrim në Shqipëri. Ai u arrestua në tetor të vitit 2020. Në atë kohë u arrestuan edhe disa shtetas të tjerë iranianë.
Pas arrestimit, Poladrag iu gjetën mesazhe dhe biseda të shkëmbyera me disa persona që jetojnë në Iran, që dyshohet se janë pjesë e Gardës Revolucionare.
Në Shqipëri gjatë muajit gusht me kërkesë të SPAK-ut u kryen disa kontrolle në banesat e shtetasve iranianë, por edhe në disa shoqata iraniane, me dyshimet se ushtronin aktivitet të paligjshëm të spiunazhit kundër opozitës iraniane, që strehohet në Manëz.
Shqipëria akuzon Iranin për “agresion shtetëror”, ndërpret marrëdhëniet diplomatike
Më 7 shtator qeveria shqiptare ndërpreu marrëdhëniet diplomatike me Iranin dhe kërkoi largimin e stafit diplomatik brenda 24 orësh.
Autoritetet iraniane kanë hedhur poshtë akuzat se janë mbrapa sulmeve të korrikut.
Megjithatë, aleanca ushtarake e NATO-s ka konfirmuar se prapa atij sulmi ka qenë Irani.
Shtetet e Bashkuara kanë sanksionuar Ministrinë iraniane të Inteligjencës dhe kreun e këtij institucioni, duke i akuzuar se qëndrojnë pas sulmit kibernetik të muajit korrik ndaj Shqipërisë.
Irani ka dënuar ashpër sanksionet amerikane.























