Sveçla: Policia e gatshme për të ofruar rend e ligj
BKT
Foto: MPB
Lajme

Sveçla: Policia e gatshme për të ofruar rend e ligj

M.Shefkiu/RTKlive

Policia e Kosovës është e përkushtuar dhe e gatshme që të ofrojë rend dhe siguri anë e mbanë Republikës së Kosovës, në koordinim të ngushtë me partnerët dhe aleatët tanë ndërkombëtarë. Kështu deklaroi ministri i Punëve të Brendshme, Xhelala Sveçla. Reagimi i tij vjen vetëm pak orë para se të nisë vendimi i Qeverisë për targat, duke aplikuar shkallën e dytë atë të gjobitjes.

Në rrjetin social facebook, Sveçla tha se ligjshmëria, respektimi dhe zbatimi i vendimeve të Qeverisë së Republikës së Kosovës janë rruga e duhur dhe e vetme në mbrojtjen e frymës dhe vet institucioneve, sundimin e rendit e të ligjit dhe garantimin e sigurisë publike.

 “Ju lus të gjithëve për bashkëpunim me përfaqësuesit e shtetit, zyrtarët policorë, solidarizim ndërshoqëror dhe ndërveprim me të gjitha institucionet e vendit tonë të cilët po  kujdesen për zbatim të vendimeve tona të drejta. Ne kemi qenë gjithnjë në rrugën e drejtë si popull e shoqëri. As u kemi shkaktuar të tjerëve padrejtësi as i kemi mbështetur ato kur u kanë ngjarë popujve të tjerë. Njëjtë jemi dhe sot”, deklaroi Sveçla.

Ministri i Brendshëm tha se kohëve të fundit janë shtuar e zgjeruar lloje e metoda propaganda dhe dezinformacioni nga përkrahësit dhe të punësuarit e Serbisë.

“Natyrisht qëllimi i tyre është për t'ju shqetësuar e shtuar pasigurinë tek ju. Për çdo orë po shpërndahen kinse informata duke asociuar ndodhi nga e kaluara e largët dhe e dhimbshme. Por të dashur bashkëqytetarë dhe bashkëqytetare, siguria e të gjithëve, pa asnjë dallim, është mision, detyrë dhe mandat i yni kushtetues e ligjor që do ta zbatojmë me përpikëri e vendosmëri”, deklaroi Sveçla.

Ministri u Brendshëm thotë se bashkëpunimi i ngushtë, komunikimi i ndërsjellë dhe fryma e mirëkuptimit lehtësojnë zbatimin e misionit. “Të gjithë bashkë për vendin tonë, për demokracinë e ligjin tonë”, shkruan në fund ministri Sveçla.


MË SHUME NGA Lajme