Osmani: Roli i kryeministrit Rama, shumë konstruktiv me Maqedoninë e Veriut
ATSH
Ministri i Jashtëm i Maqedonisë së Veriut, Bujar Osmani, tha se “roli i Kryeministrit Edi Rama ka qenë shumë konstruktiv me Maqedoninë e Veriut”.
I ftuar në një studio televizive, Osmani vuri në dukje se, roli i Ramës ka qenë konstruktiv jo vetëm ndaj faktorit shqiptar, (aspak në aspektin patronazhist siç shprehen disa) por ka qenë ndihmues, lehtësues dhe inkurajues edhe për Maqedoninë e Veriut në përgjithësi.
“Mendoj se pozicioni i tij përballë Bullgarisë, vërtet ka ndihmuar në vendimin e Bullgarisë për Maqedoninë e Veriut”, deklaroi Osmani, teksa tha se “nuk mund të them se ka qenë kyç, se marrëveshja e arritur ka zhbllokuar procesin, po presioni që i ka bërë Rama Bullgarisë në skenën ndërkombëtare, duke futur Bullgarinë në një pozitë jo të lakmueshme duke e imponuar atë publikisht ka ndihmuar në lehtësimin e raporteve me Maqedoninë e Veriut. Ashtu sikurse nuk gjej vërejtje për Kryeministrin Rama ndaj Maqedonisë së Veriut në përgjithësi dhe të shqiptarëve të Maqedonisë së Veriut atje”.
“Roli i tij ka qenë konstruktiv dhe pozitiv dhe sa i përket Ballkanit të Hapur ka qenë një vendim yni duke vlerësuar se çdo iniciativë që na ul në tavolinë dhe jo në istikame është pozitiv për rajonin”, deklaroi Osmani.























