Haradinaj për situatën në veri: Gjendja është e rëndë, kërkon koordinim
BKT
Lajme

Haradinaj për situatën në veri: Gjendja është e rëndë, kërkon koordinim

N.Mekolli /RTKlive

Kryetari i Aleancës për Ardhmërinë e Kosovës (AAK), Ramush Haradinaj thirrje partnerëve të sigurisë, posaçërisht Washingtonit, që ta marrin nën kontroll situatën në veri dhe ta ndalin përshkallëzimin e mëtejmë, i cili paraqet rrezik edhe për paqen në rajon.

Haradinaj, përmes një reagimi në llogarinë e tij në Facebook, tha se skenari i regjimit pro-rus të Serbisë për destabilizimin e Kosovës, po hyn në një fazë kritike.

“Mbyllja e pikave kufitare njëra pas tjetrës, sulmet e grupeve kriminale të sponsorizuara nga Serbia, ndaj qytetarëve, gazetarëve, Policisë, Eulexit e pjesëtarëve të KFOR-it dhe kujtdo tjetër që e kundërshton këtë skenar ogurzi, kanë marrë përmasa shqetësuese”, shkruan ai .

Sipas Haradinajt, gjendja mund të përshkallëzojë dhe të dalë krejtësisht jashtë kontrollit.

“Prandaj në një situatë të tillë, është urgjente që Kosova të mobilizojë gjithë potencialin e vet politik, diplomatik, intelektual e të sigurisë në përballje me këtë rrezik të madh. I bëj thirrje Kryeministrit që të sillet në përputhje me situatën e krijuar”, shkruan tutje ai.

Serbia nuk zmbrapset me retorika boshe luftënxitëse e as me “trimat e rrjeteve sociale” thotë Haradinaj.

Ai shton se gjendja është e rëndë dhe kërkon maturi e koordinim, jo vetëm me faktorin e brendshëm por edhe me partnerët ndërkombëtarë.

“Njëkohësisht, lus partnerët e sigurisë, posaçërisht Washingtonin, që ta marrin nën kontroll situatën në veri dhe ta ndalin përshkallëzimin e mëtejmë, i cili paraqet rrezik edhe për paqen në rajon!”, shkruan Haradinaj në Facebook.


MË SHUME NGA Lajme