Xhaçka-Lordi Peach: Të fokusohemi në rritjen e bashkëpunimit ekonomik
rtsh.al
Ministrja për Punët e Jashtme, Olta Xhaçka është takuar me të dërguarin special të Kryeministrit britanik për Ballkanin Perëndimor, Lordin Stuart Peach.
Gjatë bisedës me Peach, Xhaçka ka vlerësuar angazhimin e Mbretërisë së Bashkuar për rajonin, përfshi edhe forcimin e marrëdhënieve dypalëshe mes dy vendeve. Në këtë kuadër, Ministrja theksoi se në fokus të marrëdhënieve Shqipëri-Britani duhet të jetë nxitja e bashkëpunimit ekonomik në fusha të tilla si energjia, porti dhe infrastruktura rrugore, pasi sipas saj, janë kyçe për lidhjen rajonale.
“Takim mjaft i mirë me të dërguarin special të kryeministrit britanik për Ballkanin Perëndimor, Lordin Stuart Peach. Vlerësova angazhimin e Mbretërisë së Bashkuar për rajonin, përfshirë edhe forcimin e marrëdhënieve dypalëshe me Shqipërinë që duhet të fokusohen më shumë në nxitjen e bashkëpunimit ekonomik në fusha të tilla si energjia, porti dhe infrastruktura rrugore që janë kyçe për lidhjen rajonale”, shkruan Xhaçka në rrjetin social Facebook, teksa ndan dhe pamje nga takimi.























